لاہور۔پاکستان ویمنز کرکٹ ٹیم کی اسٹار بلے باز سدرہ امین اپنی زندگی کے نئے سفر کا آغاز کرتے ہوئے پیا گھر سدھار گئیں۔
سدرہ امین اور عادل مسعود کی شادی کی تقریب لاہور کی ایک نجی ہاؤسنگ سوسائٹی میں منعقد ہوئی، جس میں خواتین کرکٹرز سمیت کرکٹ کے دیگر شعبوں سے وابستہ افراد نے شرکت کی۔
تقریب میں خواتین کرکٹرز گل فیروزہ، سعدیہ اقبال، بسمہ معروف، نشری سندھو، سدرہ نواز، غلام فاطمہ، توبہ بتول، عالیہ ریاض اور نتالیہ پرویز سمیت دیگر نے شرکت کی اور سدرہ امین کے لیے نیک تمناؤں کا اظہار کیا۔
مزید برآں، تقریب میں عرفان اللہ خان، سید نذیر، اور علی یونس سمیت کئی دیگر اہم شخصیات بھی موجود تھیں، جنہوں نے نئے جوڑے کو مبارکباد دی۔
یہ خوشی کا موقع نہ صرف سدرہ امین بلکہ پاکستان ویمنز کرکٹ کمیونٹی کے لیے بھی ایک یادگار لمحہ تھا۔
