امریکی صدارتی انتخابات میں ڈونلڈ ٹرمپ کی کامیابی کے بعد دنیا بھر میں سوشل میڈیا پلیٹ فارم بلو سکائی کی مقبولیت میں تیزی سے اضافہ ہو رہا ہے۔
روزانہ لاکھوں نئے صارفین اس پلیٹ فارم کو جوائن کر رہے ہیں، جس کے نتیجے میں بلو اسکائی کے عالمی سطح پر صارفین کی تعداد 19 ملین تک پہنچ گئی ہے۔ پاکستان میں بھی لاکھوں افراد نے اپنے اکاؤنٹس بنا لیے ہیں، جن میں سیاستدانوں، صحافیوں اور مختلف شعبوں سے تعلق رکھنے والی معروف شخصیات شامل ہیں۔
پاکستان میں سوشل میڈیا پلیٹ فارم ایکس (سابقہ ٹوئٹر) کی حالیہ بندش کی وجہ سے پاکستانی صارفین کی بڑی تعداد بلو اسکائی پر منتقل ہو رہی ہے۔
بلو اسکائی کیا ہے؟
بلو اسکائی ایک سوشل میڈیا پلیٹ فارم ہے جو 2019 میں ٹویٹر کے حصے کے طور پر ایک تحقیقی اقدام کے طور پر قائم کیا گیا تھا اور فروری 2021 میں عوام کے لیے کھولا گیا۔ بلو اسکائی کا ڈھانچہ ایکس (سابقہ ٹوئٹر) سے کافی مشابہت رکھتا ہے، جس میں براہ راست پیغام رسانی، ویڈیو شیئرنگ، اور دیگر خصوصیات شامل ہیں۔
کہا جا رہا ہے کہ ایلون مسک کی امریکی صدارتی انتخابات میں ڈونلڈ ٹرمپ کی بھرپور حمایت کی وجہ سے ٹرمپ کے مخالفین ایلون مسک کے ایکس پلیٹ فارم کو چھوڑ کر بلو اسکائی پر منتقل ہو رہے ہیں۔
اس کے علاوہ، برطانیہ میں دی گارڈین اور اسپین میں لا وینگارڈیا جیسے اخبارات نے بھی امریکی صدارتی انتخابات کے بعد ایلون مسک کے پلیٹ فارم کو چھوڑنے کا اعلان کیا ہے۔ دی گارڈین کا کہنا ہے کہ ایکس پلیٹ فارم اکثر پریشان کن مواد کو فروغ دینے میں ملوث پایا گیا ہے۔
کچھ ایکس صارفین کا کہنا ہے کہ وہ اس پلیٹ فارم کو مکمل طور پر ترک نہیں کریں گے، لیکن انہوں نے بلو اسکائی پر بھی اپنے اکاؤنٹس بنا لیے ہیں کیونکہ اس میں لاکھوں افراد شامل ہو چکے ہیں۔
