لاہور۔پاکستان کی مشہور شوبز اسٹار ماہرہ خان نے کہا ہے کہ ان کے نزدیک کوئی بھی شخص مکمل طور پر “سیلف میڈ” نہیں ہو سکتا۔ ان کا ماننا ہے کہ کامیابی میں ہمیشہ خاندان، دوستوں اور دیگر افراد کا تعاون شامل ہوتا ہے، اور یہ تعاون ہی کسی کی کامیابی کی بنیاد بنتا ہے۔
ایک ویڈیو جو سوشل میڈیا پر وائرل ہو رہی ہے، میں ماہرہ خان نے خاندان اور دوستوں کی مدد کی اہمیت پر روشنی ڈالی۔ ایک تقریب کے دوران جب ان سے سوال کیا گیا کہ انہوں نے اپنے خطاب میں خاندان اور دوستوں کی حمایت پر زور کیوں دیا، تو اداکارہ نے جواب دیا کہ “سیلف میڈ” صرف ایک خوبصورت تصور ہے، لیکن حقیقت میں ایسا کچھ نہیں ہوتا۔ ان کے مطابق، اگر ان کے والدین، بھائی، بیٹے، دوست اور ساتھ کام کرنے والے افراد ان کی حمایت نہ کرتے، تو وہ آج اس مقام تک نہ پہنچ پاتیں۔
ماہرہ خان نے مزید کہا کہ وہ جو بھی مقام حاصل کر پائی ہیں، اس میں ان کے خاندان اور دوستوں کے علاوہ نئے ساتھیوں اور پیشہ ورانہ تعلقات کا بھی اہم کردار ہے۔ ان کے خیال میں “سیلف میڈ” کا تصور حقیقت سے زیادہ ایک خواب ہے، اور ہر فرد کی کامیابی کسی نہ کسی کی مدد اور سہارے کے بغیر ممکن نہیں ہوتی۔ ماہرہ کا کہنا تھا کہ کوئی بھی شخص تنہا دنیا میں بڑا مقام یا کامیابی حاصل نہیں کر سکتا، اور ہر کامیابی کے پیچھے دوسروں کا تعاون شامل ہوتا ہے۔
