پاکستان اور انگلینڈ کے ٹیسٹ سیریز کے میچ آفیشلز کا اعلان

پاکستان اور انگلینڈ کے درمیان تین میچز پر مشتمل ٹیسٹ سیریز کے میچ آفیشلز کا اعلان کر دیا گیا ہے۔

پاکستان کرکٹ بورڈ (پی سی بی) کی جانب سے جاری کردہ اعلامیے کے مطابق، سیریز کے پہلے ٹیسٹ میچ میں سری لنکا کے کمار دھرما سینا اور بنگلادیش کے شرف الدولہ سیکت آن فیلڈ امپائرز ہوں گے، دونوں امپائرز آئی سی سی ایلیٹ پینل کا حصہ ہیں۔

ویسٹ انڈیز کے سر رچی رچرڈسن اس سیریز میں میچ ریفری کے طور پر کام کریں گے۔

آئی سی سی ایلیٹ پینل آف امپائرز میں شامل نیوزی لینڈ کے کرسٹوفر گیفینی اور پاکستان کے آصف یعقوب فورتھ امپائر کے فرائض انجام دیں گے۔

دوسرے ٹیسٹ کے لیے کمار دھرما سینا اور کرسٹوفر گیفینی آن فیلڈ امپائرز ہوں گے جبکہ شرف الدولہ سیکت تھرڈ امپائر کے طور پر کام کریں گے۔ پاکستان کے راشد ریاض چوتھے امپائر ہوں گے۔

تیسرے ٹیسٹ کے لیے راولپنڈی کرکٹ اسٹیڈیم میں کرسٹوفر گیفینی اور شرف الدولہ سیکت آن فیلڈ امپائرز کے طور پر کام کریں گے، جبکہ کمار دھرما سینا تھرڈ امپائر ہوں گے اور فیصل آفریدی فورتھ امپائر کے فرائض نبھائیں گے۔

یہ سیریز آئی سی سی ورلڈ ٹیسٹ چیمپئن شپ کا حصہ ہے، جس کا پہلا میچ 7 سے 11 اکتوبر تک ملتان میں ہوگا۔ دوسرا ٹیسٹ 15 سے 19 اکتوبر تک ملتان کرکٹ اسٹیڈیم میں کھیلا جائے گا جبکہ آخری میچ 24 سے 28 اکتوبر تک راولپنڈی میں ہوگا۔