لاہور۔آئی سی سی چیمپئنز ٹرافی 2025 کے میچز کے ٹکٹوں کی آن لائن فروخت کا سلسلہ منگل سے شروع ہو گیا، تاہم ویب سائٹ پر زیادہ ٹریفک کی وجہ سے سرورز کے مسائل پیدا ہو گئے، جس کے باعث کرکٹ شائقین کو ٹکٹ خریدنے میں دشواری کا سامنا ہے۔
چیمپئنز ٹرافی کے ٹکٹوں کی فروخت 19 فروری سے شروع ہونے والے ایونٹ کے لیے کی جا رہی ہے، جہاں شائقین کی بڑی تعداد نے ٹکٹ خریدنے میں دلچسپی ظاہر کی ہے۔ تاہم، زیادہ تعداد میں وزیٹرز کی موجودگی کی وجہ سے ویب سائٹ کے سرورز بار بار کریش ہو رہے ہیں، جس کے نتیجے میں خریداری کا عمل متاثر ہو رہا ہے۔
ویب سائٹ کے سرورز پر دباؤ کو کم کرنے کے لیے اضافی سرورز شامل کرنے کا کام جاری ہے۔ آن لائن ٹکٹ خریدنے والے شائقین 3 فروری سے اپنے ٹکٹ نجی کوریئر کمپنی کے دفاتر سے فزیکل طور پر وصول کر سکیں گے۔
یہ بات قابل ذکر ہے کہ آئی سی سی چیمپئنز ٹرافی کے میچز 19 فروری سے 9 مارچ تک پاکستان میں منعقد ہوں گے، جبکہ بھارت کے میچز یو اے ای میں کھیلے جائیں گے۔
پاکستان کے میچز کے جنرل اسٹینڈ کے ٹکٹ کی قیمت 2 ہزار روپے جبکہ وی وی آئی پی اسٹینڈ کے ٹکٹ کی قیمت 20 ہزار روپے مقرر کی گئی ہے۔ دیگر میچز کے ٹکٹوں کی قیمتیں ایک ہزار سے لے کر 7 ہزار روپے تک رکھی گئی ہیں، جبکہ لاہور میں سیمی فائنل کے جنرل اسٹینڈ کا ٹکٹ ڈھائی ہزار اور وی وی آئی پی کا ٹکٹ 20 ہزار روپے کا ہوگا۔
پاکستان اور بھارت کے درمیان دبئی میں کھیلے جانے والے میچ کے ٹکٹوں کی فروخت کی تفصیلات بعد میں جاری کی جائیں گی۔
