تجارتی معاہدوں کو حتمی شکل دینے کیلئے پاکستانی فوڈ ایکسپورٹرز وفد کی دورہ ملائیشیا میں ایک ہفتہ کی توسیع

پاکستان کے فوڈ ایکسپورٹرز کے وفد نے جو اس وقت ملائیشیا کے دو ہفتے کے دورے پر ہے، ملائیشین بزنس کمیونٹی کے مثبت ردعمل کی وجہ سے اپنے قیام میں مزید ایک ہفتے کی توسیع کا فیصلہ کیا ہے۔ کوالالمپور سے موصول ہونے والے پیغام کے مطابق، پاکستانی وفد کے رہنما سیف الرحمان نے بتایا کہ وفد کے ارکان نے پاکستان کی متنوع اور اعلیٰ معیار کی غذائی مصنوعات، خاص طور پر نمکو کی بہترین اقسام کی کامیابی سے نمائش کی ہے، جس نے ملائیشین بزنس کمیونٹی کو بہت زیادہ متوجہ کیا ہے۔

سیف الرحمان نے کہا کہ پاکستانی غذائی مصنوعات تمام بین الاقوامی معیارات پر پورا اُترتی ہیں اور ذائقے میں بھی شاندار ہیں۔ انہوں نے مزید کہا کہ ہم مارکیٹ کے نئے مواقع سے فائدہ اٹھا کر اور باہمی تجارتی تعاون کو فروغ دے کر برآمدات کے حجم میں اضافہ کر سکتے ہیں۔ ان کا کہنا تھا کہ یہ اقدام دونوں ممالک کے درمیان اقتصادی تعلقات کو فروغ دیتے ہوئے ملائیشیا کی فوڈ مارکیٹ میں پاکستان کے قدموں کو مستحکم کرنے کے لیے پاکستان کے عزم کا عکاس ہے۔

دورے کے دوران وفد نے بزنس ٹو بزنس میٹنگز اور مصنوعات کی نمائشوں میں شرکت کی، جن میں پاکستان کے پراسیسڈ فوڈز کی اہمیت اور پوٹینشل کو اجاگر کیا گیا۔ سیف الرحمان نے کہا کہ ملائیشیا کے اسٹیک ہولڈرز کا ردعمل انتہائی حوصلہ افزا رہا ہے اور انہوں نے طویل مدتی شراکت داریوں میں گہری دلچسپی ظاہر کی ہے۔