لاہور۔گورنر پنجاب اورصوبائی وزیر اطلاعات عظمی بخاری آمنے سامنے آگئے ،گورنر پنجاب نے اپنے ایک بیان میں کہا کہ 24نومبرکو لاہور سے کوئی بندہ نہیں نکلا ،حکومت کو کنٹینر نہیں لگانے چاہئیں تھے جبکہ انہوں نے صوبائی وزیر اطلاعات عظمی بخاری پر بھی سخت تنقید کرتے ہوئے کہا کہ حکومت نے اس کو کھلی چھوٹ دے رکھی ہے ایسا نہیں ہونا چاہیے
جس کے جواب میں صوبائی وزیراطلاعات عظمٰی بخاری نے کہا کہ گورنر پنجاب اپنے مشورے اپنی پارٹی کی حکومتوں کو دیں۔ پنجاب میں اپنے آئینی کردار کی حدود میں رہیں۔ آپ کو پنجاب پولیس کے شہدا اور زخمیوں کی پروا نہیں لیکن پی ٹی آئی کے شرپسندوں کی فکر لاحق ہے۔
ٰی بخاری نے کہا کہ تحریک انصاف کی قیادت خود اپنی ہی پارٹی کے پنجاب کے لوگوں پر بندے نہ نکالنے پر برہم ہو رہی ہے۔ آپ کو تحریک انصاف سے اتنی ہی ہمدردی ہے تو گورنرشپ چھوڑ کر پی ٹی آئی میں شمولیت اختیار کرلیں۔
پنجاب سے لوگ تحریک انصاف کے نہیں نکلے اور پریشانی گورنر پنجاب کو ہے۔ وزیراعلی پنجاب مریم نواز نے ذمہ داری کا مظاہرہ کرتے ہوئے پولیس کو غیر مسلح رکھا۔ مریم نواز کی کارکردگی کے نتیجے میں پنجاب سے فتنے کی حمایت میں لوگ نہیں نکلے۔ پنجاب پولیس کے 2 جوان شہید اور 171 زخمی ہوئے ہیں۔
عظمٰی بخاری نے کہا کہ میں گورنر پنجاب کو میڈیا میں زندہ رہنے کے لیے بھوںڈے طریقے اختیار کرنے سے پرہیز کا مشورہ ہی دے سکتی ہوں۔ایک طرف گورنر پنجاب کہہ رہے بندے کیوں پہنچے ہیں اور دوسری طرف کہہ رہے ہیں کنٹینر کیوں لگائے ہیں؟ حکومت کیسے کرنی ہے اور انتظامی معاملات کیسے چلانے ہیں یہ جاننے کے لیے ہمیں آپ کے مشوروں کی ضرورت نہیں۔
