میں بالی وڈ کو چھوڑنے کے قریب تھا، شاہ رخ خان کا انکشاف

دبئی: بالی وڈ کے کنگ خان، شاہ رخ خان نے حال ہی میں انکشاف کیا کہ ان کے کیریئر کے آغاز میں ایک ایسا وقت بھی آیا جب انہوں نے فلم انڈسٹری کو خیرباد کہنے کا فیصلہ کر لیا تھا۔ دبئی میں منعقدہ گلوبل فریٹ سمٹ کے دوران شاہ رخ خان نے اپنے کیریئر کی ابتدا اور اس کے دوران پیش آنے والی مشکلات کے بارے میں بات کی۔

شاہ رخ خان نے بتایا، “جب میں سیٹ پر آیا تو مجھے لگا کہ میں ایک بہترین اداکار ہوں، لیکن جلد ہی یہ احساس ہوا کہ سیٹ پر موجود ہر شخص مجھ سے بہتر جانتا ہے کہ اداکاری کیسے کی جاتی ہے۔” یہ بات انہوں نے اپنے ابتدائی دنوں کے بارے میں بتاتے ہوئے کی جب انہیں فلم انڈسٹری میں اپنے مقام کا پتا نہیں تھا۔

اداکار نے مزید انکشاف کیا، “مجھے لگا کہ میں ناکام ہوں اور دہلی واپس جانے کے لیے فلائٹ بک کروالی تھی۔ انٹرنیشنل فلائٹ 25 فیصد سستی تھی اور مہنگی فلائٹ افورڈ نہیں کر سکتا تھا۔” شاہ رخ نے کہا کہ وہ گھر واپس جا کر اپنی زندگی نئے سرے سے شروع کرنا چاہتے تھے کیونکہ اس وقت ان کی ذہنی حالت بہت خراب تھی۔

شاہ رخ خان نے مزید کہا، “ہر دن مجھے یہ احساس ہوتا ہے کہ ابھی بہت کچھ سیکھنا باقی ہے۔ کیریئر کے 35 سالوں میں جب بھی سیٹ پر گیا، یہ احساس ہوا کہ میں خود کو بہتر کیسے بنا سکتا ہوں۔” انہوں نے بتایا کہ ان کے کیریئر میں مسلسل سیکھنے کا عمل جاری رہا، اور یہی وہ چیز تھی جس نے انہیں کامیاب ہونے کی طرف گامزن کیا۔

شاہ رخ خان کی یہ باتیں ان کے مداحوں کے لیے ایک سبق ہیں، جو سمجھتے ہیں کہ کامیابی صرف محنت اور خود کو بہتر بنانے کے عمل سے ہی حاصل ہوتی ہے۔