نوجوت سنگھ سدھو کی کپل شرما کے شو میں واپسی

بھارت کے مقبول کامیڈی شو “دی گریٹ انڈین کپل شو” میں نوجوت سنگھ سدھو کی واپسی نے مداحوں کو حیرت میں ڈال دیا ہے۔ سدھو نے حال ہی میں سوشل میڈیا پر شو کے ٹیزر کا اشتراک کیا، جس میں وہ کپل شرما کے شو میں واپس آتے ہوئے نظر آ رہے ہیں۔

ٹیزر میں دکھایا گیا ہے کہ ارچنا پورن سنگھ کپل شرما سے اپنی کرسی واپس لینے کی درخواست کر رہی ہیں، اور یہ بھی دلچسپ ہے کہ اس پرومو میں سنیل گروور بھی سدھو کا کردار ادا کرتے ہوئے دکھائی دے رہے ہیں اور دونوں خوب ہنسی مذاق کرتے ہیں۔ اس ویڈیو میں ہربھجن سنگھ بھی اپنی اہلیہ گیتا بسرا کے ساتھ شو میں شریک ہیں، جس سے شو میں مزید دلچسپی کا اضافہ ہو گیا ہے۔

سدھو کی اس واپسی پر ان کے مداح خوشی کا اظہار کر رہے ہیں اور کامیڈی شو میں ان کی دوبارہ شرکت پر بے حد خوش ہیں۔ 2019 میں پلوامہ حملے پر سدھو کے ایک بیان کے بعد بھارت میں تنازعہ کھڑا ہو گیا تھا، جس کے بعد انتہا پسند ہندوؤں کی طرف سے ان کے خلاف مظاہرے شروع ہو گئے تھے اور شو سے ان کی برطرفی کا مطالبہ کیا گیا تھا۔ اس دباؤ کے بعد شو کی انتظامیہ نے سدھو کو شو سے الگ کر دیا تھا۔

تاہم، اب جب کہ سدھو کی واپسی ہو رہی ہے، اس خبر نے شو کے مداحوں میں ایک نئی دلچسپی پیدا کر دی ہے۔ سدھو کی غیر موجودگی میں ان کی نشست پر اداکارہ ارچنا پورن سنگھ نے جگہ لے لی تھی اور وہ اب تک شو میں شریک ہیں۔ اس دوران، مداحوں میں یہ سوال اکثر گردش کرتا رہا ہے کہ کیا سدھو شو میں واپس آئیں گے یا نہیں؟ اب ان کی واپسی نے اس سوال کا جواب دے دیا ہے۔