پاکستان کی معروف اداکارہ ہانیہ عامر نے حال ہی میں ایک ایونٹ کے دوران دیے گئے دلچسپ انٹرویو میں یہ کہا کہ “انہیں زندگی میں کامیابی چاہیے، اور پیار وہ اپنی کامیابی سے حاصل کر لیں گی۔” ہانیہ عامر، جو اس وقت پاکستان سمیت دنیا بھر میں مشہور ڈرامے “کبھی میں کبھی تم” کی کامیابی کے باعث زیرِ بحث ہیں، نے اس جواب کے ذریعے شائقین کی خوب داد سمیٹی۔
ریپڈ فائر راؤنڈ میں پوچھے گئے سوالات کے دوران ایک سوال تھا کہ اگر انہیں زندگی میں پیار چاہیے یا کامیابی؟ ہانیہ نے دلچسپ انداز میں جواب دیا کہ “کامیابی چاہیے، پیار میں اپنی کامیابی سے کر لوں گی۔” ان کے اس جواب نے ایونٹ میں موجود لوگوں کو محظوظ کر دیا۔
مزید سوالات کے دوران ہانیہ سے پوچھا گیا کہ اگر انہیں زندگی میں کسی ایک رشتے کو مضبوط کرنا ہو تو وہ کون سا رشتہ ہوگا؟ اس پر ہانیہ کا جواب تھا کہ “میں خود کے ساتھ اپنے رشتے کو مضبوط بنانا چاہوں گی۔” اس جواب پر بھی ایونٹ میں موجود افراد نے ہانیہ کی ذہانت اور خوداعتمادی کی تعریف کی۔
ایک اور سوال پر جب ہانیہ سے پوچھا گیا کہ وہ کس چیز کے لیے مشہور ہیں، تو اداکارہ نے کہا کہ “میں کچھ خاص چیزوں کے لیے مشہور ہوں۔” اس پر ایک لڑکی نے مذاقاً کہا “بدتمیزی” کے بارے میں، جس پر ہانیہ نے ہنستے ہوئے جواب دیا کہ “مجھے یہ مزاح لگتا ہے، اور میرے مذاق سے کسی کا دل نہیں دکھتا۔”
ہانیہ عامر ان دنوں غیر ملکی دورے پر ہیں اور مختلف تقاریب میں شرکت کر رہی ہیں، جن کی ویڈیوز سوشل میڈیا پر وائرل ہو رہی ہیں۔ اداکارہ کو “کبھی میں کبھی تم” میں فہد مصطفیٰ کے ساتھ ان کی زبردست اداکاری کے لیے بےحد پسند کیا گیا ہے، اور ان کی شہرت میں مزید اضافہ ہوا ہے۔ ناظرین کی جانب سے ہانیہ کی پرفارمنس کو بےحد سراہا جا رہا ہے۔
