پاکستان سٹاک ایکسچینج میں تیزی کا سلسلہ جاری ہے، جس کے نتیجے میں ملکی تاریخ میں پہلی بار انڈیکس نے 85,615 پوائنٹس کی نئی بلند ترین سطح عبور کر لی ہے۔
کے ایس ای 100 انڈیکس 705 پوائنٹس کے اضافے کے ساتھ 85,615 پوائنٹس پر پہنچ گیا۔ افراط زر میں کمی کے تناسب سے شرح سود میں نمایاں کمی کی توقعات، آئی ایم ایف پروگرام میں شمولیت، اور سعودی عرب و خلیجی ممالک کی آئل اور گیس سیکٹر میں ممکنہ سرمایہ کاری جیسے عوامل نے اسٹاک مارکیٹ میں تیزی کو جنم دیا۔
اس تیزی کے باعث متعدد حصص کی قیمتیں بڑھ گئیں، جس کے نتیجے میں اربوں روپے کا اضافہ ہوا۔ رواں سال غیرملکی سرمایہ کاری میں 17 فیصد کا اضافہ اور تجارتی خسارہ قابو میں آنے جیسے عوامل نے غیر ملکیوں اور مقامی سرمایہ کاروں کو آئل، گیس، فرٹیلائزر اور بینکنگ سیکٹر میں سرمایہ کاری کی ترغیب دی ہے۔ اس سے کیپیٹل مارکیٹ کا گراف بلند ہونے کی جانب گامزن ہے۔
