کراچی ۔ ٹی وی کے معروف اداکار مظہر علی کا انتقال ہو گیا۔ مرحوم کے اہلخانہ نے بتایا کہ مظہر علی دل کے عارضے میں مبتلا تھے اور ایک نجی ہسپتال میں زیر علاج تھے۔ ان کی نماز جنازہ آج بعد از مغرب طیبہ مسجد ناظم آباد نمبر 3 میں ادا کی جائے گی۔اداکار مظہر علی حال ہی میں پاکستان آئے تھے، جبکہ ان کی فیملی کینیڈا میں مقیم ہے۔ ان کی ہمشیرہ اہلہ عمران نے کہا کہ مظہر علی کافی عرصے سے علیل تھے اور ان کا انتقال سوتے ہوئے ہوا۔ انہوں نے مزید کہا کہ صحت کی خرابی کے باعث مظہر علی ٹی وی چینلز پر کام نہیں کر سکے۔مظہر علی نے این ای ڈی یونیورسٹی سے سول انجینئرنگ میں بیچلرز کی ڈگری حاصل کی تھی۔ ان کے مشہور ڈراموں میں “شاہین”، “خدا اور محبت”، “ہالہ”، “انتظار کر بھی”، “تعبیر”، “عروسہ”، “بادلوں پر بھروسہ” اور “افشاں” شامل ہیں۔
