وزیرتعلیم پنجاب رانا سکندر حیات نے دونوں بازوؤں سے معذور طالبہ مہوش عزیزی کو مزید تعلیم کی خواہش پر سکالرشپ دینے کا اعلان کیا ہے۔
وزیر تعلیم سے مہوش کی ملاقات کے دوران، اس نے اپنے پاؤں کی مدد سے بنائی گئی پینٹنگز پیش کیں۔ رانا سکندر حیات نے طالبہ کی ہمت اور عزم کی تعریف کی۔
مہوش، جو جمبر گاؤں کی رہائشی ہیں، 4 سال کی عمر میں کرنٹ لگنے کی وجہ سے دونوں بازوؤں سے محروم ہوگئیں، لیکن انہوں نے اپنی تعلیم پاؤں کی مدد سے حاصل کی۔
وزیر نے کہا کہ مہوش جیسے طلبہ کی سرپرستی اور حوصلہ افزائی ہماری ذمہ داری ہے۔ اس کے علاوہ، رانا سکندر حیات نے مہوش کو اپنی جیب سے 50 ہزار روپے کیش انعام دیا اور سرکاری نوکری دلوانے کے ساتھ ساتھ 3 مرلہ کا پلاٹ بھی تحفے میں دینے کا اعلان کیا۔
