اسلام آباد۔ پاکستان تحریک انصاف کے سنگجانی جلسے کی جگہ تبدیل کر دی گئی ہے، اور اس کا نوٹیفکیشن بھی جاری کر دیا گیا ہے۔ نوٹیفکیشن کے مطابق تحریک انصاف کا جلسہ اب مویشی منڈی سنگجانی اسلام آباد کے مقام پر منعقد ہوگا۔ پہلے اسلام آباد پولیس اور انتظامیہ کی ٹیمیں سنگجانی جلسہ گاہ پر پہنچی تھیں، جہاں پولیس نے پی ٹی آئی کے کارکنوں اور سامان کو جلسہ گاہ سے ہٹانے کا حکم دیا تھا۔ اس کے بعد علاقائی مجسٹریٹ اور پولیس ٹیم کے بلال اعجاز اور فیصل امین گنڈاپور کے درمیان مذاکرات ہوئے، اور وزیر اعلیٰ کے پی علی امین گنڈاپور کی مداخلت کے بعد جلسے کی جگہ تبدیل کر دی گئی۔ فیصل امین اور بلال اعجاز نے جلسہ گاہ سے سامان ہٹانے کا حکم دیا، جس کے بعد جلسہ اب سنگجانی مویشی منڈی کے قریب گراؤنڈ میں جی ٹی روڈ کے پاس ہوگا۔
