بیجنگ۔ چین میں اسکول کے دروازے پر کھڑے بچوں کو ایک اسکول بس نے کچل دیا۔ عالمی خبر رساں ادارے کے مطابق، یہ دل دہلا دینے والا واقعہ چین کے صوبے شینڈونگ کے شہر تائی آن میں صبح 7 بجے پیش آیا، جب بچے قطار میں کھڑے ہو کر اسکول میں داخل ہو رہے تھے۔ اس دوران ایک تیز رفتار اسکول بس نے درجن بھر بچوں کو کچل دیا۔ زخمی بچوں کو ہسپتال منتقل کیا گیا، جہاں 11 افراد کی ہلاکت کی تصدیق کر دی گئی، جبکہ زخمیوں کی تعداد کے بارے میں مختلف اطلاعات موصول ہو رہی ہیں۔ سوشل میڈیا پر وائرل تصاویر میں دیکھا جا سکتا ہے کہ ایک بس کے قریب سڑک پر خون میں لتھڑے ہوئے یونی فارم میں ملبوس بچوں کی لاشیں بکھری ہوئی ہیں اور والدین ان کے قریب بیٹھے اشکبار ہیں۔
