میلبورن۔ دنیا بھر میں سرطان تیزی سے پھیل رہا ہے اور بہت سے افراد اپنی زندگیوں سے ہاتھ دھو بیٹھتے ہیں۔ یہ بیماری جسم کے کسی بھی حصے کو متاثر کر سکتی ہے، اور اکثر اسے ابتدائی مراحل میں نہیں پکڑا جا سکتا۔حال ہی میں مغربی آسٹریلیا کی یونیورسٹی ہیری پرکنز انسٹی ٹیوٹ آف میڈیکل ریسرچ کی جانب سے ایک تحقیق میں یہ بات سامنے آئی ہے کہ شہد کی مکھی کا زہر سرطان کے خلیوں کو مارنے میں موثر ہو سکتا ہے۔ یہ تحقیق 2020 میں کی گئی اور بین الاقوامی جریدے “این پی جے نیچر پریسجن آنکولوجی” میں شائع ہوئی۔تحقیق کے لیے محققین نے 312 شہد کی مکھیوں اور بھومبلیوں کے زہر کا جائزہ لیا۔ اس سے معلوم ہوا کہ شہد کی مکھی کا زہر ٹرپل منفی چھاتی کے کینسر اور HER2 سے افزودہ چھاتی کے کینسر کے خلیات کو تیزی سے تباہ کر سکتا ہے۔ ڈاکٹر سیارا ڈفی نے بتایا کہ پہلے کسی نے چھاتی کے کینسر اور عام خلیوں میں شہد کی مکھی کے زہر یا میلیٹن کے اثرات کا موازنہ نہیں کیا تھا۔تحقیق کے مطابق، میلیٹن 60 منٹ کے اندر کینسر کے خلیوں کی جھلیوں کو تباہ کر سکتا ہے اور صرف 20 منٹ میں کینسر کی کیمیائی نقل و حرکت کو کم کرتا ہے، جو کینسر کے خلیوں کی نشوونما کے لیے ضروری ہے۔یہ تحقیق ایک چوہے پر کی گئی تھی جس میں سرطان کو کم کرنے میں مدد ملی، اور اس کے نتائج کے مطابق میلیٹن کو چھوٹے مالیکیولز یا کیموتھراپی کے ساتھ استعمال کیا جا سکتا ہے۔
