ویرات کوہلی نے سچن ٹنڈولکر اور ڈان بریڈ مین کے ریکارڈز توڑ ڈالے

بھارتی کرکٹر ویرات کوہلی نے اپنے کیریئر میں ایک نیا سنگ میل عبور کیا ہے اور کرکٹ کی تاریخ میں ایک اور عظیم ریکارڈ اپنے نام کر لیا ہے۔

اتوار کو پرتھ میں آسٹریلیا کے خلاف بارڈر گواسکر ٹرافی کے پہلے ٹیسٹ میچ میں ویرات کوہلی نے اپنی 30 ویں ٹیسٹ سنچری بنائی، جس کے ساتھ ہی انہوں نے سچن ٹنڈولکر اور ڈان بریڈ مین جیسے کرکٹ کے عظیم بلے بازوں کے ریکارڈ توڑ ڈالے۔

آسٹریلوی سرزمین پر یہ کوہلی کی ساتویں سنچری تھی، جس کے ساتھ ہی وہ اس میدان پر سب سے زیادہ سنچریاں بنانے والے بھارتی بلے باز بن گئے ہیں۔ اس سے قبل سچن ٹنڈولکر آسٹریلیا میں 6 سنچریاں بنا کر اس ریکارڈ پر قابض تھے۔ ٹنڈولکر نے یہ کارنامہ 20 میچز میں انجام دیا تھا، جبکہ ویرات کوہلی نے صرف 14 میچز میں سات سنچریاں بنا کر یہ ریکارڈ توڑا۔

کوہلی نے اس کے علاوہ اپنی 30 ٹیسٹ سنچری بنا کر کرکٹ کی تاریخ کے عظیم ترین آسٹریلوی بیٹسمین سر ڈان بریڈ مین کو بھی پیچھے چھوڑ دیا، جنہوں نے ٹیسٹ کرکٹ میں 29 سنچریاں بنائی تھیں۔

سچن ٹنڈولکر ٹیسٹ کرکٹ میں 51 سنچریوں کے ساتھ سرفہرست ہیں، جب کہ جنوبی افریقا کے جیک کیلس 45 سنچریوں کے ساتھ دوسرے اور رکی پونٹنگ 41 سنچریوں کے ساتھ تیسرے نمبر پر ہیں۔