سری لنکا اے کیخلاف سیریز: محمد ہریرہ پاکستان شاہینز کے کپتان مقرر

سری لنکا اے کے خلاف سیریز کے لیے محمد ہریرہ کو پاکستان شاہینز کا کپتان مقرر کر دیا گیا ہے۔ دونوں ٹیمیں 11 سے 29 نومبر تک اسلام آباد کلب میں ایک دوسرے کے مدمقابل آئیں گی، جہاں سیریز میں دو چار روزہ اور تین 50 اوورز کے میچز شیڈول ہیں۔ مہمان ٹیم 8 نومبر کو پاکستان پہنچے گی۔

پاکستان کرکٹ بورڈ (پی سی بی) کی جانب سے جاری کردہ اعلامیے میں بتایا گیا کہ مینز نیشنل سلیکشن کمیٹی نے 2 چار روزہ میچوں کے لیے 14 رکنی اسکواڈ کا اعلان کیا ہے، جبکہ 50 اوورز کے میچوں کے لیے 15 رکنی اسکواڈ منتخب کیا گیا ہے۔

ٹیسٹ فاسٹ بولرز محمد وسیم جونیئر اور خرم شہزاد اپنے ری ہیب مکمل کرنے اور قائداعظم ٹرافی کے میچز کھیلنے کے بعد اسکواڈ میں شامل ہو گئے ہیں۔ اسی طرح، حسین طلعت بھی 50 اوورز کی سیریز کے لیے اسکواڈ میں شامل ہیں۔ محمد غازی غوری اور احمد صفی عبداللہ پہلی مرتبہ شاہینز کی نمائندگی کریں گے۔

وائٹ بال اسکواڈ میں عبدالصمد، حیدر علی، معاذ صداقت، محمد حارث، محمد عمران جونیئر اور روحیل نذیر نے اے سی سی مینز ایمرجنگ ایشیا کپ اسکواڈ سے اپنی جگہ برقرار رکھی ہے، جبکہ محمد عمران، سراج الدین اور عبید شاہ پہلی بار شاہینز کی ٹیم کا حصہ بنے ہیں۔

پاکستان شاہینز کا ریڈ بال اسکواڈ کل سے ٹریننگ کا آغاز کرے گا، جبکہ سری لنکا اے 9 نومبر کو اپنی ٹریننگ کا آغاز کرے گی۔ وائٹ بال سیریز کے کھلاڑی 22 نومبر کو اسلام آباد میں جمع ہوں گے، اور تین ایک روزہ میچوں کی سیریز 25، 27 اور 29 نومبر کو کھیلی جائے گی۔