پاکستان شاہینز کا بھارت کے خلاف ٹی20 ایمرجنگ ایشیا کپ میں پہلا میچ کل

پاکستان شاہینز اے سی سی مینز ٹی20 ایمرجنگ ٹیمز ایشیاکپ میں کل اپنا پہلا میچ بھارت کے خلاف کھیلنے جا رہی ہے۔

یہ ٹورنامنٹ عمان کرکٹ اکیڈمی گراؤنڈ میں شروع ہوا ہے۔ پاکستان شاہینز گروپ بی میں بھارت اے، متحدہ عرب امارات اور میزبان عمان کے ساتھ شامل ہیں، جبکہ گروپ اے میں بنگلادیش اے، سری لنکا اے، ہانگ کانگ اور افغانستان اے ہیں۔

محمد حارث کی قیادت میں پاکستان شاہینز کی ٹیم 21 اکتوبر کو میزبان عمان کے ساتھ مقابلہ کرے گی، جبکہ اس کا تیسرا گروپ میچ 23 اکتوبر کو متحدہ عرب امارات کے خلاف ہوگا۔

ہر گروپ سے دو دو ٹیمیں 25 اکتوبر کو ہونے والے سیمی فائنلز کے لیے کوالیفائی کریں گی، اور فائنل 26 اکتوبر کو کھیلا جائے گا۔ ٹورنامنٹ کے میچز ایشین کرکٹ کونسل کے یوٹیوب چینل پر لائیو نشر ہوں گے۔

اے سی سی ایمرجنگ ٹیمز ٹورنامنٹ کا یہ پہلا ایڈیشن ہے جو ٹی20 فارمیٹ میں کھیلا جا رہا ہے، جبکہ اس سے قبل 2013، 2017، 2018، 2019 اور 2023 میں پانچ ایڈیشن ون ڈے فارمیٹ میں ہوئے تھے۔

پاکستان 2019 میں سعود شکیل اور 2023 میں محمد حارث کی قیادت میں یہ ٹورنامنٹ جیت چکا ہے۔

پاکستان شاہینز اسکواڈ:

محمد حارث (کپتان)
عبدالصمد
احمد دانیال
عرفات منہاس
حیدر علی
معاذ صداقت
محمد عباس آفریدی
محمد عمران جونیئر
عمیر بن یوسف
قاسم اکرم
روحیل نذیر
شاہنواز دھانی
سفیان مقیم
یاسر خان
زمان خان