کراچی: انٹرمیڈیٹ پری انجینئرنگ کے نتائج آج

کراچی: اعلیٰ ثانوی تعلیمی بورڈ کراچی کی جانب سے اعلان کیا گیا ہے کہ انٹرمیڈیٹ حصہ دوم پری انجینئرنگ گروپ کے سالانہ امتحانات 2024ء کے نتائج آج بروز جمعہ، 11 اکتوبر 2024ء کو شام چار بجے جاری کیے جائیں گے۔

نتائج کا اعلان ہونے کے فوراً بعد انہیں بورڈ کی ویب سائٹ www.biek.edu.pk پر اپ لوڈ کیا جائے گا۔ امیدوار اپنے نتائج اعلیٰ ثانوی تعلیمی بورڈ کراچی کی آفیشل اینڈرائیڈ ایپ کے ذریعے بھی دیکھ سکتے ہیں۔

یہ ایپ گوگل پلے اسٹور میں BIEK کے نام سے تلاش کر کے اپنے موبائل میں انسٹال کی جا سکتی ہے۔ مزید برآں، نتائج کی سافٹ کاپی (پی ڈی ایف فائل) انٹربورڈ کراچی کے آفیشل واٹس ایپ گروپ کے ذریعے میڈیا کو فراہم کی جائے گی۔

یاد رہے کہ انٹرمیڈیٹ کے تمام گروپس کے نتائج کا اعلان ہونے کے بعد پوزیشن ہولڈرز طلبہ کی حوصلہ افزائی کے لیے ایک بڑی تقریب کا اہتمام کیا جائے گا، جس میں طلبہ کے والدین، اساتذہ اور میڈیا کے نمائندے بھی مدعو کیے جائیں گے۔