انٹارکٹیکا کی ہریالی میں اضافہ، موسمیاتی تبدیلیوں کے اثرات کی نشاندہی

حال ہی میں یہ انکشاف ہوا ہے کہ دنیا کا سرد ترین براعظم، انٹارکٹیکا، تیزی سے سرسبز ہو رہا ہے۔

برطانوی انٹارکٹک سروے اور ایکسیٹر اینڈ ہرٹ فورڈ شائر یونیورسٹیوں کی مشترکہ تحقیق کے مطابق، موسمیاتی تبدیلیوں کی وجہ سے انٹارکٹک کی ہریالی میں تیزی آ رہی ہے۔

انٹارکٹک جزیرہ نما پر ہریالی کا رقبہ 1986 میں 1.1 مربع میل سے بڑھ کر 2021 میں تقریباً 14.3 مربع میل ہو گیا ہے۔

تحقیق بتاتی ہے کہ پچھلے 60 سالوں میں انٹارکٹیکا میں درجہ حرارت میں نمایاں اضافہ ہوا ہے، خاص طور پر مغربی انٹارکٹک اور انٹارکٹک جزیرہ نما میں، جہاں گرمی کی شرح عالمی اوسط درجہ حرارت کے مقابلے میں کہیں زیادہ تیز ہے۔

نیچر جیو سائنس میں شائع ہونے والی اس تحقیق میں کہا گیا ہے کہ 1986 سے 2021 کے مطالعے کی مدت کے مقابلے میں، 2016 سے 2021 کے دوران انٹارکٹیکا میں سبزہ زاری کے رجحان میں 30 فیصد سے زیادہ تیزی آئی ہے۔ یہ نتائج موسمیاتی تبدیلی کے اثرات کی شدت کو اجاگر کرتے ہیں اور اس بات کی نشاندہی کرتے ہیں کہ عالمی درجہ حرارت میں اضافے کے نتیجے میں برفانی علاقوں کی ماحولیاتی حالت میں بھی تبدیلی آ رہی ہے۔