پاکستان اور سعودی عرب اقتصادی تعاون میں مزید مضبوطی کیلیے ملکر کام کر رہے ہیں، وزیراعظم

اسلام آباد ۔وزیراعظم محمد شہباز شریف نے کہا ہے کہ پاکستان اور سعودی عرب باہمی طور پر فائدہ مند اقتصادی اور سرمایہ کاری کے تعاون کو مزید مستحکم کرنے کے لیے مل کر کام کر رہے ہیں۔

وزیراعظم ہاؤس اسلام آباد میں سعودی عرب کے نائب وزیر داخلہ عزت ڈاکٹر ناصر بن عبدالعزیز الداؤد سے ملاقات کے دوران وزیراعظم نے سعودی نائب وزیر داخلہ کا پاکستان میں خیرمقدم کیا اور ان کے لیے نیک خواہشات کا اظہار کیا۔

وزیراعظم نے خادم الحرمین الشریفین شاہ سلمان بن عبدالعزیز آل سعود اور سعودی ولی عہد و وزیر اعظم محمد بن سلمان کے لیے نیک خواہشات کا اظہار کیا۔ دونوں ممالک کے درمیان تاریخی اور برادرانہ تعلقات کا ذکر کرتے ہوئے وزیراعظم نے سعودی قیادت اور حکومت کا شکریہ ادا کیا جو ہر مشکل وقت میں پاکستان کے ساتھ رہی۔

وزیراعظم نے پاکستان میں 2.8 ارب امریکی ڈالر کی سعودی سرمایہ کاری اور دونوں ممالک کے درمیان مفاہمت کی یادداشتوں پر عمل درآمد پر اپنے اطمینان کا اظہار کیا۔

ملاقات میں غزہ اور مشرق وسطیٰ کی موجودہ صورتحال پر بھی تبادلہ خیال کیا گیا۔ ریاض میں ہونے والی حالیہ عرب اسلامی سربراہی کانفرنس کا ذکر کرتے ہوئے وزیراعظم نے سعودی عرب کی قیادت کی تعریف کی اور سعودی ولی عہد و وزیراعظم محمد بن سلمان کی فلسطین میں اسرائیل کے نسل کشی کے اقدامات کے خلاف اور غزہ میں تشدد کے خاتمے کے لیے امت مسلمہ کو متحد کرنے کی کوششوں کو سراہا۔

دفاعی اور سیکیورٹی تعاون کی اہمیت پر زور دیتے ہوئے وزیراعظم نے کہا کہ نائب وزیر داخلہ اور ان کے وفد کا دورہ دونوں ممالک کو ان حساس شعبوں میں مزید تعاون بڑھانے کے لیے قریب لائے گا۔

وزیراعظم نے سعودی ولی عہد و وزیر اعظم محمد بن سلمان کو پاکستان کے سرکاری دورے کی دعوت کا اعادہ کیا اور کہا کہ پاکستانی عوام ان کے استقبال کے لیے بیتاب ہیں۔