بالی ووڈ کے معروف ڈائریکٹر روہت شیٹی نے ایک دلچسپ انکشاف کیا ہے کہ سلمان خان کا مشہور کردار چلبول پانڈے اور اجے دیوگن کا کردار باجیراؤ سنگھم ایک ہی فلم میں نظر آئیں گے، تاہم دونوں کردار روہت شیٹی کے “کاپ یونیورس” کا حصہ نہیں بنیں گے۔
انہوں نے وضاحت دیتے ہوئے کہا کہ یہ فلم ایک “اسٹینڈالون” پروجیکٹ ہوگی، جس میں دو مختلف “آئی پی” (Intellectual Properties) یا کائناتوں کا امتزاج ہوگا، لیکن اس کا موجودہ پولیس یونیورس سے کوئی تعلق نہیں ہوگا۔
روہت شیٹی نے ایک انٹرویو میں بتایا، “ہم ان کرداروں کو تخلیق کر رہے تھے اور یہ دونوں ایک دوسرے کی کہانیوں میں شامل ہو رہے تھے۔ لیکن چلبول اور سنگھم ایک دوسرے کی کائناتوں میں نہیں ہوں گے۔ وہ دونوں ایک الگ فلم میں نظر آئیں گے۔”
فلم “سنگھم اگین” کے اختتام پر سلمان خان کی مختصر انٹری نے شائقین کو خاصا چونکا دیا تھا، جب انہوں نے اپنا معروف جملہ “سواگت نہیں کروگے ہمارا؟” بولا۔ اس پر بات کرتے ہوئے روہت شیٹی نے کہا کہ اس مختصر انٹری کا مقصد صرف اگلی فلم کا تعارف کرانا تھا، نہ کہ سلمان خان کو مکمل طور پر فلم کا حصہ بنانا۔
