عامر اور اجے نے ’عشق‘ کے سیکوئیل کا اشارہ دیدیا

بالی ووڈ کے مشہور اداکار اجے دیوگن اور عامر خان نے 1997 کی سپرہٹ فلم عشق کے سیکوئل کا اشارہ دے کر اپنے مداحوں کو حیرانی میں مبتلا کر دیا ہے۔ دونوں اداکاروں نے حال ہی میں فلم تیرا یار ہوں میں کے مہورت کے موقع پر ملاقات کی، جہاں انھوں نے عشق کی کامیاب یادوں کو تازہ کیا اور ایک نئے سیکوئل کی خواہش ظاہر کی۔

اس موقع پر عامر خان نے اجے دیوگن سے محبت بھرے الفاظ میں کہا، “ہم کم ملتے ہیں، مگر جب بھی ملتے ہیں تو دل سے محبت اور اپنائیت کے ساتھ ملتے ہیں۔ مجھے اجے دیوگن کی شخصیت بہت پسند ہے۔” اجے دیوگن نے بھی اس موقع پر عشق کے سیٹ پر گزارے گئے یادگار لمحات کو یاد کرتے ہوئے کہا، “ہم نے عشق کے سیٹ پر بہت مزے کیے تھے، اور مجھے لگتا ہے کہ ہمیں دوبارہ ایک ساتھ کام کرنا چاہیے۔” عامر خان نے ان کی بات سے فوری اتفاق کیا۔

فلم عشق 1997 میں ریلیز ہوئی تھی، جس میں اجے دیوگن، عامر خان، کاجول اور جوہی چاولہ نے اہم کردار ادا کیے تھے۔ اس فلم نے محبت اور دوستی کو مزاحیہ انداز میں پیش کیا تھا، جس کی وجہ سے یہ آج بھی شائقین کے دلوں میں زندہ ہے۔

اس مہورت میں بالی ووڈ کی کئی معروف شخصیات بھی موجود تھیں، جن میں ارونا ایرانی، جاوید جعفری، افتاب شیو دسانی، اور ہدایتکار بونی کپور، راج کمار سنتوشی اور انیس بزمی شامل تھے۔ اس موقع پر امن کمار، جو کہ اندر کمار کے بیٹے ہیں، اپنی پہلی فلم کے ساتھ ڈیبیو کر رہے ہیں۔