راولپنڈی: آرمی چیف نے کثیر الملکی مشق ’’انڈس شیلڈ 2024‘‘ کا معائنہ کیا، جس میں 24 فضائی افواج شامل ہیں۔پاک فوج کے شعبہ تعلقات عامہ (آئی ایس پی آر) کے مطابق، آرمی چیف جنرل سید عاصم منیر نے آج پاکستان ائیر فورس کے آپریشنل ائیر بیس کا دورہ کیا۔ ان کا استقبال چیف آف ائر اسٹاف، ائر چیف مارشل ظہیر احمد بابر سدھو (نشانِ امتیاز ملٹری) نے کیا۔
آرمی چیف جاری کثیر الملکی مشق ’’انڈس شیلڈ-2024‘‘ کا معائنہ کرنے پہنچے، جہاں چیف آف نیول اسٹاف ایڈمرل نوید اشرف (نشانِ امتیاز ملٹری) بھی موجود تھے۔ یہ مشق خطے کی سب سے بڑی کثیر القومی مشق ہے، جس میں 24 فضائی افواج حصہ لے رہی ہیں۔
’’اکٹھے ہوکر مضبوط تر‘‘ کے عنوان سے جاری یہ مشق بین الاقوامی ہم آہنگی اور جدید سہولیات کے ذریعے تربیت کو فروغ دینے کا ایک شاندار موقع فراہم کرتی ہے۔
آرمی چیف نے پاکستان ائیر فورس کی جنگی تیاریوں اور اپ گریڈیشن پروگراموں میں پیش رفت پر اطمینان کا اظہار کیا۔ انہوں نے مشق کے آپریشنز اور جدید ٹیکنالوجیز کے مظاہرے کا بھی مشاہدہ کیا۔ اس موقع پر انہیں پاکستان ائیر فورس کی جانب سے بریفنگ دی گئی، جس میں سیکیورٹی چیلنجز کا سامنا کرنے کے لیے تیاریوں اور اپ گریڈیشن کے بارے میں تفصیلات فراہم کی گئیں۔
بعد ازاں، پاکستان ائیر فورس کے لڑاکا طیاروں نے شاندار فضائی کارکردگی کا مظاہرہ کیا۔ آرمی چیف نے فضائی عملے سے ملاقات کی اور پاکستان کی فضائی سرحدوں کی حفاظت کے عزم کو سراہا۔ انہوں نے تینوں مسلح افواج کے درمیان تعاون کی اہمیت پر زور دیا، یہ بتاتے ہوئے کہ یہ آپریشنل کامیابی کے لیے ناگزیر ہے۔
چیف آف ائیر اسٹاف نے آرمی چیف کے دورے پر ان کا شکریہ ادا کیا اور فوج اور فضائیہ کے درمیان تربیت و آپریشنز میں تعاون کو بڑھانے کے عزم کا اعادہ کیا۔ انہوں نے کہا کہ جاری مشق ’’انڈس شیلڈ-2024‘‘ شریک ممالک کے درمیان ہم آہنگی کو مزید مضبوط کرے گی اور ان کے فضائی و زمینی عملے کو موجودہ دور کے جنگی چیلنجز کا مقابلہ کرنے کے لیے تیار کرے گی۔
