لاہور۔وزیر اعلیٰ پنجاب مریم نوازشریف کی زیر صدارت صوبائی کابینہ کا 17 واں اجلاس ہوا جس میں پنجاب میں اجتماعی شادیوں کے سب سے بڑے تاریخی پروگرام کی منظوری دی گئی ۔پنجاب بھر میں تین ہزار غریب خاندان کی بچیوں کی اجتماعی شادی کا منصوبہ تیار کیا گیا ہے۔دلہن کو اے ٹی ایم کارڈ کے ذریعے ایک لاکھ روپے سلامی دی جائے گی۔فرنیچر، ملبوسات، ڈنر سیٹ سمیت استعمال کی13 اشیاگفٹ کی جائیں گی۔وزیر اعلیٰ مریم نوازشریف نے اجتماعی شادیوں کا دائر کار مزید بڑھانے کی ہدایت کی ۔ اجلاس میں پنجاب بھر میں عارضی کاشت کے لئے ایک لاکھ ایکڑ تین اور پانچ سال لیز پر بے زمین کاشتکاروں کو الاٹ کرنے کی منظوری دی گئی ۔ پنجاب میں ای بس سروس سکیم کی منظوری بھی دی گئی جس کے پہلے مرحلے میں 27 بسیں آئیں گی۔ای بسوں کی پارکنگ میں چارجنگ کے لئے 1.2 میگا واٹ سولر پینل لگائے جائیں گے۔پنجاب بھر میں 680 ای بسیں سال کے آخر تک فنکشنل ہونگی ۔وزیر اعلیٰ مریم نوازشریف نے لاہور میں الیکٹرک ٹیکسی کا پلان طلب کر لیا۔وزیر اعلیٰ مریم نوازشریف نے صوبہ بھر میں آٹا اور چکن کے نرخ کی کڑی مانیٹرنگ کا حکم دیا ۔ اجلاس میں الحمرا لاہور میں اجوکا تھیٹر فیسٹول کے لئے 10 ملین روپے کے فنڈز کی منظوری دی گئی۔
