قلات ۔بلوچستان کے ضلع قلات میں رات گئے بم دھماکے کے نتیجے میں کم از کم 3 سیکورٹی اہلکار شہید اور 4 زخمی ہوگئے ہیں۔انتظامیہ کے ایک سینیئر اہلکار کے مطابق یہ واقعہ قلات شہر کے قریب اسکلکو روڈ پر پیش آیا۔پولیس اہلکار نے بتایا کہ اسکلکو روڈ پر دشت محمود کے مقام پر نامعلوم افراد نے دھماکہ خیز مواد نصب کیا ہوا تھا، جو اس وقت پھٹا جب سیکیورٹی فورسز کی ایک گاڑی وہاں سے گزر رہی تھی۔ان کے مطابق، دھماکے کے نتیجے میں گاڑی میں سوار 3 اہلکار شہید ہوگئے جبکہ 4 دیگر زخمی ہوئے، جنہیں طبی امداد کے لیے اسپتال منتقل کیا گیا ہے۔اہلکار نے یہ بھی بتایا کہ دھماکہ دیسی ساختہ بم کے ذریعے کیا گیا، اور ابھی تک کسی گروہ نے اس واقعے کی ذمہ داری قبول نہیں کی ہے۔
