ممبئی: بھارت کے معروف یوٹیوبر دھروو راٹھی کی اہلیہ جولی کے ہاں پہلے بیٹے کی پیدائش ہوئی ہے۔
دھروو راٹھی نے 21 ستمبر کو اپنے انسٹاگرام ہینڈل پر یہ خوشخبری مداحوں کے ساتھ شیئر کی۔ انہوں نے دو تصاویر پوسٹ کیں، جن میں ایک میں وہ مسکراتے ہوئے اپنے نومولود بیٹے کو گود میں اٹھائے بیٹھے ہیں، جبکہ دوسری تصویر میں بیٹے کا چہرہ مداحوں کو دکھایا۔
اپنی پوسٹ میں دھروو راٹھی نے لکھا کہ اس خوشخبری کے ساتھ، ہم اپنے بیٹے کا دنیا میں استقبال کر رہے ہیں۔
مداحوں اور بالی ووڈ اداکارہ دیا مرزا سمیت دیگر فنکاروں نے انہیں بیٹے کی پیدائش پر مبارکباد پیش کی اور نیک تمناؤں کا اظہار کیا۔
دھروو راٹھی نے 2021 میں اپنی دیرینہ دوست جولی سے آسٹریا میں شادی کی تھی اور بعد میں بھارت میں بھی ہندو رسم و رواج کے مطابق شادی کی تھی۔
وہ اپنی اہلیہ کے ساتھ جرمنی میں مقیم ہیں اور سماجی و تاریخی موضوعات پر معلوماتی ویڈیوز بنانے کی وجہ سے مشہور ہیں، ان کے یوٹیوب چینل پر 2 کروڑ 87 لاکھ سبسکرائبرز ہیں۔ رواں سال کے آغاز میں دھروو راٹھی نے بھارتی انتخابات سے پہلے اپنی ویڈیوز کے ذریعے مودی حکومت اور ہندو انتہا پسندوں کے پروپیگنڈوں کو بے نقاب کیا تھا۔
