اسلام آباد۔فری اینڈ فیئر الیکشن نیٹ ورک (فافن) نے رحیم یار خان کے ضمنی انتخاب کو ’بڑے پیمانے پر شفاف‘ قرار دے دیا ہے۔قومی اسمبلی کے حلقہ این اے 171 میں 13 ستمبر کو ہونے والے ضمنی انتخاب کے غیر سرکاری نتائج کے مطابق، پاکستان پیپلز پارٹی (پی پی پی) کے امیدوار مخدوم طاہر رشید الدین نے پاکستان تحریک انصاف (پی ٹی آئی) کے حسان مصطفیٰ کو شکست دی۔
غیر سرکاری نتائج کے مطابق، پیپلز پارٹی کے مخدوم طاہر رشید الدین نے ایک لاکھ سولہ ہزار چار سو انتیس ووٹ حاصل کیے، جبکہ پی ٹی آئی کے حسان مصطفیٰ نے اٹھاون ہزار دو سو اکیاون ووٹ لیے۔فافن کی رپورٹ کے مطابق، رحیم یار خان کے ضمنی انتخاب میں پیپلز پارٹی کے ووٹوں میں 40 فیصد سے زائد اضافہ ہوا ہے۔ رپورٹ میں بتایا گیا ہے کہ پیپلز پارٹی کے ووٹ شیئر میں بہتری آئی ہے، جو کہ 3 فیصد سے بڑھ کر 40 فیصد تک پہنچ گئی ہے۔
فافن کی رپورٹ میں کہا گیا ہے کہ این اے 171 کے حلقے میں رجسٹرڈ ووٹرز کی کل تعداد باون لاکھ چھ ہزار نو سو تہتر ہے، جن میں دو لاکھ اٹھاسی ہزار ایک سو تیرہ مرد اور دو لاکھ اڑتیس ہزار آٹھ سو ساٹھ خواتین شامل ہیں۔یہ حلقہ زیادہ تر تحصیل رحیم یار خان اور خانپور کے دیہی علاقوں پر مشتمل ہے، جن میں کوٹ سمابہ، میاںوالی قریشیاں، رکناں پور، سردار گڑھ، آباد پور، احسان پور، ظاہر پیر، فتح پور کمال، چچران شریف، نواں کوٹ، ججہ عباسیان اور کوٹلہ پٹھان شامل ہیں۔یہ نشست پی ٹی آئی کے حمایت یافتہ رکن قومی اسمبلی رئیس ممتاز مصطفیٰ کے حالیہ انتقال کے بعد خالی ہوئی تھی۔
