امریکی ریاست اوہائیو میں دریا کے سیلابی ریلے نے متعدد علاقوں کو متاثر کیا، تاہم کینٹکی کے ایک ریسٹورنٹ کے مالکان نے پانی کے خطرے سے نمٹنے کے لیے ایک منفرد اور غیر روایتی طریقہ اپنایا — انھوں نے اپنی عمارت کے اندر صاف پانی بھردیا تاکہ گندے سیلابی پانی کو اندر آنے سے روکا جا سکے۔
پراسپیکٹ شہر میں واقع ’کیپٹن کوارٹرز ریور سائیڈ گرل‘ نامی ریسٹورنٹ کے شریک مالک اینڈریو ماسٹرسن نے اس حکمت عملی کو سوشل میڈیا پر براہِ راست دکھایا۔ فیس بک لائیو ویڈیو میں وہ اور ان کی ٹیم ریسٹورنٹ کو تقریباً 6 فٹ تک صاف پانی سے بھرنے کے عمل میں مصروف نظر آئے، تاکہ سیلابی پانی کی یلغار کو روکا جا سکے۔
اس مقصد کے لیے ماسٹرسن اور عملے نے نلکوں، سنک اور زیر زمین کنویں کے پانی کو پمپ کے ذریعے عمارت کے اندر بھرا۔ ویڈیو میں انہوں نے بتایا کہ اس عمل سے پہلے تمام برقی آلات اور کچن کی مشینری کو الگ کر دیا گیا تھا تاکہ کسی قسم کا نقصان نہ ہو۔
ماسٹرسن کے مطابق، اگر یہ تجربہ کامیاب رہا تو یہ ریسٹورنٹ کو ممکنہ طور پر مہنگی مرمت اور وقت طلب صفائی کے عمل سے بچا سکتا ہے — ایک ایسا چالاک حل جو قدرتی آفت کے دوران ذہانت اور تدبر کی مثال بن سکتا ہے۔
