ماہرین کے ایک گروہ نے حیران کن انکشاف کیا ہے کہ انہوں نے ایک ایسا قدیم بھیڑیا دوبارہ زندہ کر دیا ہے جو تقریباً 12,500 سال قبل دنیا سے ناپید ہو چکا تھا۔
ٹیکساس کی حیاتیاتی تحقیقاتی کمپنی Colossal Biosciences کے سائنسدانوں نے بتایا ہے کہ انہوں نے قدیم ڈی این اے کے دو نمونوں کی مدد سے کلوننگ اور جینیاتی ترمیم (gene editing) کی جدید تکنیک استعمال کرتے ہوئے تین زندہ بھیڑیے پیدا کیے ہیں۔
ان میں شامل دو نر بچے چھ ماہ کے ہیں، جنہیں رومولس اور ریمس کا نام دیا گیا ہے — یہ نام رومی دیو مالا کے کرداروں سے متاثر ہیں — جبکہ تیسرا بچہ تین ماہ کی مادہ ہے، جس کا نام خلیسی رکھا گیا ہے، جو مشہور سیریز گیم آف تھرونز کے ایک کردار کی طرف اشارہ ہے، جہاں دیو قامت بھیڑیے دکھائے گئے تھے۔
کمپنی کے سی ای او بین لیم نے اس کامیابی کو سائنسی دنیا میں ایک تاریخی پیش رفت اور تحقیق کے میدان میں “اہم سنگ میل” قرار دیا ہے۔
سوشل میڈیا پلیٹ فارم ایکس (سابقہ ٹوئٹر) پر کمپنی نے ان تینوں بچوں کی ایک تصویر بھی شیئر کی اور کیپشن میں لکھا:
“آپ ایک ایسی مخلوق کی آواز سن رہے ہیں جو 10,000 سال سے دنیا میں موجود نہیں تھی۔ رومولس اور ریمس سے ملیے — معدومیت سے واپس آنے والے دنیا کے پہلے جانور!”
