محبت نہ سرحدیں دیکھتی ہے، نہ رنگ و نسل اور نہ ہی سماجی حیثیت — کچھ ایسا ہی واقعہ بھارت کی ریاست آندھرا پردیش کے ایک معمولی سے گاؤں میں دیکھنے کو ملا، جہاں ایک امریکی خاتون اپنے دیسی محبوب سے شادی کرنے جا پہنچی۔
بھارتی ذرائع ابلاغ کے مطابق یہ گاؤں، جو پہلے گمنامی میں تھا، اب ایک بین الاقوامی لو اسٹوری کی وجہ سے شہ سرخیوں میں ہے۔
یہ انوکھا رشتہ سوشل میڈیا پلیٹ فارم انسٹاگرام پر شروع ہوا، جہاں ایک سادہ سا پیغام “Hi” محبت کی بنیاد بن گیا۔ صرف 14 ماہ کی آن لائن بات چیت کے دوران دونوں نے محسوس کیا کہ وہ ایک دوسرے کے لیے ہی بنے ہیں۔
جیکولین فاریرو نامی امریکی خاتون، جو پیشے کے لحاظ سے فوٹوگرافر ہیں، نے اپنی محبت کی خاطر ہزاروں میل کا فاصلہ طے کیا اور آندھرا پردیش کے اس دیہات میں پہنچ گئیں جہاں ان کے محبوب چندن رہائش پذیر ہیں۔
جیکولین کا کہنا ہے کہ انسٹاگرام پر رابطے کے دوران انہوں نے چندن کی بات اپنی والدہ سے بھی کروائی تھی تاکہ وہ اس بڑے فیصلے میں ان کی حمایت حاصل کر سکیں۔
انہوں نے مزید کہا کہ وہ اپنی ماں کی رضامندی اور اعتماد کے ساتھ بھارت آئی ہیں تاکہ اپنی محبت کو رشتۂ ازدواج میں بدل سکیں۔
