کوئٹہ: جمہوری وطن پارٹی کے رہنما نوابزادہ گہرام بگٹی کو پولیس نے ڈیرہ بگٹی میں واقع بگٹی ہاؤس سے حراست میں لے لیا۔
نوابزادہ گہرام بگٹی نے آج بلوچستان حکومت کے خلاف لانگ مارچ کرنے کا اعلان کیا تھا، جس کے پیش نظر ان کی گرفتاری عمل میں لائی گئی۔
ڈپٹی کمشنر ڈیرہ بگٹی نے تھری ایم پی او کے تحت گرفتاری کے احکامات جاری کیے، جس کے بعد پولیس نے بگٹی ہاؤس میں کارروائی کرتے ہوئے انہیں بغیر کسی مزاحمت کے گرفتار کر لیا۔
ایس ایس پی ڈیرہ بگٹی کے مطابق نوابزادہ گہرام بگٹی کو تیس روز کے لیے جیل منتقل کیا جائے گا۔
دوسری جانب، جمہوری وطن پارٹی کے رہنما نوابزادہ شازین بگٹی نے کہا ہے کہ گہرام بگٹی کی گرفتاری کو عدالت میں چیلنج کیا جائے گا، اور قانونی مشاورت کے بعد آئندہ کا لائحہ عمل طے کیا جائے گا۔
انہوں نے یہ بیان ڈیرہ بگٹی میں قلعے کے باہر موجود مجمع سے خطاب کے دوران دیا۔
