کراچی ۔کراچی کے علاقے کورنگی میں آئل ریفائنری کے قریب لگنے والی شدید آگ پر کئی گھنٹے گزرنے کے باوجود قابو نہیں پایا جا سکا، جبکہ فائر بریگیڈ کی 10 گاڑیاں آگ بجھانے کی کوششوں میں مصروف ہیں۔
ریسکیو ذرائع کے مطابق، آگ مبینہ طور پر گیس پائپ لائن میں خرابی کے باعث لگی، تاہم اصل وجوہات جاننے کے لیے تحقیقات جاری ہیں۔ خوش قسمتی سے، تاحال کسی جانی نقصان کی اطلاع نہیں ملی، لیکن آگ سے اٹھنے والا دھواں قریبی علاقوں میں پھیل گیا، جس کے باعث مقامی رہائشیوں کو مشکلات کا سامنا ہے۔
فائر بریگیڈ حکام نے اس واقعے کو تیسرے درجے کی آگ قرار دیا ہے، جبکہ پولیس حکام نے تصدیق کی ہے کہ آگ آئل ریفائنری سے دور لگی ہے۔ سوئی سدرن گیس کمپنی (ایس ایس جی سی) کا عملہ بھی موقع پر پہنچ گیا ہے تاکہ صورتحال کا جائزہ لیا جا سکے۔
آگ بجھانے کے لیے شہر بھر سے فائر ٹینڈرز طلب کیے گئے ہیں۔ابتدائی اطلاعات کے مطابق، پانی کی پائپ لائن کی بورنگ کے دوران گیس لائن کو نقصان پہنچا۔ آگ کی نوعیت پراسرار ہے اور یہ واضح نہیں ہو سکا کہ کونسی گیس لائن متاثر ہوئی ہے۔ پانی ڈالنے کے باوجود، آگ دوبارہ بھڑک رہی ہے، جس کے پیش نظر کسی ڈمپر یا ہیلی کاپٹر کے ذریعے مٹی ڈالنے کی ضرورت پیش آ سکتی ہے۔
دوسری جانب، گورنر سندھ کامران ٹیسوری نے چیف فائر آفیسر سے رابطہ کر کے جلد از جلد آگ پر قابو پانے کی ہدایات جاری کی ہیں۔فائر فائٹنگ آپریشن مکمل ہونے کے بعد ہی اصل نقصان کا اندازہ لگایا جا سکے گا۔
