شہر قائد میں ماہ شوال کا چاند نظر آنے کی خوشی میں ہونے والی ہوائی فائرنگ کے نتیجے میں 15 شہری اندھی گولیوں لگنے سے زخمی ہوگئے۔
چاند رات کے موقع پر مختلف علاقوں میں شدید ہوائی فائرنگ ہوئی، جس کے باعث خواتین اور بچوں سمیت 15 افراد زخمی ہوئے۔
یہ واقعات قصبہ نیو میانوالی کالونی، نارتھ ناظم آباد حیدری مارکیٹ، اورنگی قصبہ موڑ، فرنٹیئر کالونی، لیاری ہنگوہ آباد، رنچھوڑ لائن رامسوامی، اور اورنگی ٹاؤن ساڑھے گیارہ کے علاقے میں پیش آئے۔
اورنگی ٹاؤن قصبہ موڑ میں فائرنگ کے نتیجے میں 9 سالہ بچی آسیہ زخمی ہوئی، جبکہ ساڑھے گیارہ میں 35 سالہ نوشین نامی خاتون اور 11 سالہ ارم بھی زخمی ہوگئیں۔ اسی طرح ناظم آباد ایک نمبر پر اندھی گولی لگنے سے منصور نامی شہری زخمی ہوا اور بلدیہ قائم خانی کالونی میں ہوائی فائرنگ سے 16 سالہ وحید زخمی ہوگیا۔
لیاری میں گیارہ سالہ ایان اور بلدیہ گلشن مزدور میں فائرنگ سے ایک شخص زخمی ہو گیا۔
تمام زخمیوں کو اسپتال منتقل کر دیا گیا ہے، اور ان کی حالت خطرے سے باہر ہے۔
دوسری جانب، تھانہ منگھوپیر پولیس نے چاند رات کے موقع پر ہوائی فائرنگ کرنے والے ملزم کو رنگے ہاتھوں گرفتار کر لیا۔ ایس ایس پی ویسٹ طارق الہی مستوئی نے بتایا کہ گرفتار ملزم منگھوپیر کے علاقے سلطان آباد میں ہوائی فائرنگ جیسے جان لیوا جرم کا ارتکاب کر رہا تھا۔
کیماڑی پولیس نے بھی کارروائی کرتے ہوئے ہوائی فائرنگ کرنے والے 4 ملزمان کو گرفتار کر کے ان کے قبضے سے اسلحہ برآمد کیا۔
