مشرق وسطیٰ کے لیے برآمدات میں 17.98 فیصد اضافہ، قطر، کویت اور بحرین میں کمی
رواں مالی سال کی ابتدائی ششماہی کے دوران مشرق وسطیٰ کے ممالک کو کی جانے والی برآمدات میں مجموعی طور پر 17.98 فیصد کا اضافہ ہوا، تاہم قطر، کویت اور بحرین کو برآمد کی جانے والی اشیا میں نمایاں کمی دیکھنے میں آئی۔
اسٹیٹ بینک آف پاکستان کے جاری کردہ اعداد و شمار کے مطابق، مالی سال 2024 کے جولائی تا دسمبر کے دوران مشرق وسطیٰ کو برآمدات کا حجم 1.597 ارب ڈالر تک پہنچ گیا، جبکہ گزشتہ مالی سال کی اسی مدت میں یہ مالیت 1.506 ارب ڈالر رہی تھی۔
رپورٹ کے مطابق، گزشتہ مالی سال کے مقابلے میں رواں مالی سال کی پہلی ششماہی میں مشرق وسطیٰ کے ممالک کو برآمدات میں 0.091 ارب ڈالر یعنی 18 فیصد اضافہ ریکارڈ کیا گیا۔
یہ امر قابل ذکر ہے کہ گزشتہ مالی سال کے دوران مشرق وسطیٰ کے لیے برآمدات میں 35.23 فیصد کا نمایاں اضافہ ہوا تھا، جس کے نتیجے میں زرمبادلہ کے ذخائر 2.33 ارب ڈالر سے بڑھ کر 3.155 ارب ڈالر تک پہنچ گئے تھے۔
اسٹیٹ بینک کے مطابق، رواں مالی سال کی پہلی ششماہی میں سعودی عرب کو برآمدات میں 10.88 فیصد اضافہ دیکھنے میں آیا، جو 328.23 ملین ڈالر سے بڑھ کر 363.97 ملین ڈالر تک پہنچ گئیں۔
