بھارت میں ایک حیران کن واقعہ سامنے آیا ہے، جہاں ایک خاتون پر الزام ہے کہ انہوں نے اپنے شوہر کو بلیک مارکیٹ میں گردہ بیچنے پر اُکسایا اور پھر حاصل شدہ رقم چرا کر اپنے عاشق کے ساتھ فرار ہو گئیں۔
یہ واقعہ مغربی بنگال میں پیش آیا، جہاں ایک خاتون نے مبینہ طور پر اپنی بیٹی کی اعلیٰ تعلیم اور مستقبل میں اس کی شادی کے انتظامات کے لیے اپنے شوہر کو قائل کرنے کی کوشش میں کئی ماہ صرف کیے۔
ابتداء میں شوہر اس فیصلے پر ہچکچاہٹ کا شکار تھا، تاہم بالآخر وہ اس یقین پر آمادہ ہو گیا کہ یہ قربانی اس کے خاندان کی مالی حالت کو بہتر بنانے اور بیٹی کے مستقبل کو محفوظ بنانے میں مدد دے گی۔
شوہر نے تقریباً ایک سال تک بلیک مارکیٹ میں مناسب خریدار کی تلاش کی، حالانکہ بھارت میں انسانی اعضاء کی فروخت گزشتہ تین دہائیوں سے غیر قانونی ہے۔ آخرکار، اسے ایک خریدار ملا، اور ایک تکلیف دہ آپریشن کے بعد، اس نے اپنا گردہ بیچ کر 10 لاکھ بھارتی روپے حاصل کیے، جو اس نے اپنی بیوی کے حوالے کر دیے۔
لیکن خاتون نے یہ رقم چرا کر اپنے عاشق کے ساتھ راہِ فرار اختیار کر لی، جس کے بعد یہ معاملہ منظرِ عام پر آیا اور مقامی سطح پر خاصی ہلچل مچ گئی۔
