اسلام آباد: کرپشن اور بدعنوانی میں ملوث سی ڈی اے اور فیڈرل گورنمنٹ ایمپلائز ہاؤسنگ فاؤنڈیشن کے اہلکاروں سمیت چار ملزمان کو گرفتار کر لیا گیا ہے۔
ایف آئی اے کے ترجمان کے مطابق اینٹی کرپشن سرکل اسلام آباد نے بڑی کارروائیاں کرتے ہوئے سرکاری اہلکاروں سمیت چار ملزمان کو حراست میں لے لیا۔ گرفتار کیے گئے ملزمان میں فخر عباس، رانا منیر، معراج آفریدی، اور قیصر عباس شامل ہیں۔ یہ گرفتاریاں اس وقت عمل میں آئیں جب اسپیشل جج سنٹرل اسلام آباد نے ملزمان کی ضمانت قبل از گرفتاری منسوخ کر دی۔
فخر عباس، جو سی ڈی اے میں بطور پٹوری تعینات ہے، پر الزام ہے کہ اس نے موضع شاہ اللہ دتہ، سیکٹر ڈی-13 کی زمین کے حوالے سے جعلی رپورٹس تیار کیں اور چار کنال زمین کی جعلی ملکیت ظاہر کی۔ دیگر ملزمان کے ساتھ مل کر پاور آف اٹارنیز دھوکہ دہی سے رجسٹرڈ کرائی گئیں اور شکایت کنندہ سے 70 لاکھ روپے کا فراڈ کیا گیا۔
رانا منیر، جو فیڈرل گورنمنٹ ایمپلائز ہاؤسنگ فاؤنڈیشن میں ڈپٹی ڈائریکٹر ہیں، اور معراج آفریدی، جو ایگزیکٹو انجینئر ہیں، نے قیصر عباس کے ساتھ مل کر جعلسازی کے ذریعے پلاٹ کی ملکیت ایک غیر متعلقہ شخص کے نام منتقل کر دی۔
ایف آئی اے ترجمان کے مطابق ملزمان کے خلاف گزشتہ سال مقدمات درج کیے گئے تھے۔ گرفتار افراد سے تفتیش کا آغاز کر دیا گیا ہے، جبکہ دیگر ملوث افراد کی گرفتاری کے لیے چھاپے مارے جا رہے ہیں۔
