سالِ نو کا آغاز وسطی بحر الکاہل کے جزائر سے ہوا، جہاں کیریباتی اور اس کے سب سے بڑے جزیرے کیریتیماتی میں نیا سال پہلے منایا گیا۔ اس کے بعد نیوزی لینڈ اور پھر آسٹریلیا میں نئے سال کا جشن منایا جائے گا۔
دنیا میں جب پہلے علاقے میں نیا سال منایا جا رہا تھا، پاکستان میں اس وقت سہ پہر کے تین بج رہے تھے۔
امریکا کے سمووا علاقے اور متعدد امریکی جزائر سال نو کا جشن منانے والے آخری مقامات ہوں گے۔
یہ وقت کی تفریق انٹرنیشنل ڈیٹ لائن کی وجہ سے ہے، جس کے باعث اس کے دونوں طرف مختلف تاریخیں ہوتی ہیں۔
دنیا میں 39 ٹائم زونز استعمال کیے جاتے ہیں اور کچھ پڑوسی ممالک کے درمیان 15 سے 30 منٹ کا فرق بھی ہوتا ہے۔
پاکستانی وقت کے مطابق 31 دسمبر کو 6:30 پر آسٹریلیا دوسرا ملک ہوگا جو نئے سال کا جشن منائے گا، تاہم آسٹریلیا کی ریاست کوئنزلینڈ اور 6 دیگر مقامات پر یہ لمحہ آدھے گھنٹے بعد، یعنی 7 بجے ہوگا۔
آسٹریلیا کے شمالی علاقے 7:30 پر نئے سال کو خوش آمدید کہیں گے۔ مغربی علاقے 8 بجے تک انتظار کریں گے۔
8 بجے جاپان، جنوبی کوریا، روس، شمالی کوریا، انڈونیشیا وغیرہ میں نئے سال کا آغاز ہوگا، جو رات 10 بجے تک جاری رہے گا۔
میانمار اور مغربی آسٹریلیا کے جزائر میں سال نو کا آغاز 10:30 پر ہوگا، اور 11 بجے بنگلادیش، قازقستان، کرغزستان، بھوٹان اور بحر ہند کے جزائر میں نئے سال کا جشن منایا جائے گا۔
نیپال میں 11:15 اور بھارت، سری لنکا میں 11:30 پر نئے سال کا آغاز ہوگا۔
پاکستان میں سال نو کا آغاز اس کے بعد ہوگا۔ آدھے گھنٹے بعد افغانستان میں بھی نیا سال آئے گا، جبکہ 1 بجے آذربائیجان، متحدہ عرب امارات، آرمینیا اور روس کے کچھ حصوں میں نیا سال شروع ہو جائے گا۔
ایران میں 1:30 پر، اور 2 بجے روس کے دارالحکومت ماسکو، ترکیہ، سعودی عرب، عراق، ایتھوپیا، صومالیہ اور کینیا میں نیا سال منایا جائے گا۔
3 بجے یونان، مصر، لبنان، روانڈا، رومانیہ اور 26 دیگر مقامات پر نیا سال شروع ہوگا۔
4 بجے جرمنی، نائیجریا، الجزائر، اٹلی، بیلجیئم، مراکش، البانیہ اور فرانس کے علاقوں میں نیا سال آئے گا۔ 5 بجے برطانیہ، 6 بجے گرین لینڈ، برازیل، جنوبی جارجیا اور ساؤتھ سینڈوچ آئی لینڈز میں نیا سال منایا جائے گا۔
7 بجے برازیل، ارجنٹینا، چلی، یوروگوئے اور انٹارکٹیکا کے کچھ حصوں میں سال نو کا آغاز ہوگا، اور آدھے گھنٹے بعد کینیڈا، وینزویلا وغیرہ میں بھی یہی منظر ہوگا۔
امریکا میں نیا سال 9 بجے شروع ہوگا، پھر 10 بجے میکسیکو اور 11 سے 1 بجے تک امریکا کی مختلف ریاستوں میں منایا جائے گا۔
پاکستانی وقت کے مطابق 2 جنوری کو ڈیڑھ بجے فرنچ پولی نیشیا کے جزائر میں، 2 بجے امریکی ریاست ہوائی، اور 3 بجے سہ پہر امریکی سمووا میں نیا سال آغاز ہوگا۔
دنیا میں سب سے آخر میں پاکستانی وقت کے مطابق صبح 4 بجے 2 جنوری کو امریکا کے غیر آباد جزائر بشمول بیکر آئی لینڈز اور ہاؤلینڈ میں نیا سال ہوگا۔
