راولپنڈی ۔یومِ یکجہتی کشمیر کے موقع پر مسلح افواجِ پاکستان نے مقبوضہ جموں و کشمیر کے عوام کی منصفانہ جدوجہد میں اپنی غیر متزلزل حمایت کا اعادہ کیا ہے۔
پاک فوج کے شعبہ تعلقاتِ عامہ (آئی ایس پی آر) کی جانب سے جاری کردہ بیان میں کہا گیا ہے کہ کشمیریوں کے حقِ خودارادیت اور ان کی جائز جدوجہد کی حمایت پاکستان کی اصولی پالیسی کا حصہ ہے۔ بیان میں کشمیری عوام کے ناقابلِ تسخیر حوصلے اور عزم کو خراجِ تحسین پیش کیا گیا، جو کئی دہائیوں سے بھارتی ظلم و جبر کا سامنا کر رہے ہیں۔
آئی ایس پی آر کے ترجمان کے مطابق کشمیری عوام ریاستی سرپرستی میں ہونے والی بربریت اور انسانی حقوق کی سنگین خلاف ورزیوں کا بہادری سے مقابلہ کر رہے ہیں۔ مسلح افواج نے اس عزم کا اظہار کیا کہ پاکستان کی خودمختاری اور سالمیت کے تحفظ کے لیے ہر لمحہ تیار ہیں اور کشمیری بھائیوں کے شانہ بشانہ کھڑے رہیں گے۔بیان کے اختتام پر کہا گیا: پاکستان زندہ باد! کشمیر زندہ باد!
