صرف ٹائپ سی چارجر کا استعمال، یورپ میں قانون نافذ

یورپی یونین کی جانب سے نافذ کردہ نئے قانون کے مطابق، آج سے یورپ بھر میں صرف ٹائپ سی چارجر استعمال کیے جائیں گے۔

یہ قانون اکتوبر 2022 میں یورپی یونین کی کونسل نے منظور کیا تھا، جس کے تحت الیکٹرانک آلات کے مینوفیکچررز کو اپنی مصنوعات کے ڈیزائن میں تبدیلیاں کرنے اور نئے چارجرز کے استعمال کو یقینی بنانے کے لیے مدت فراہم کی گئی تھی۔

یہ قوانین مختلف الیکٹرانک آلات جیسے موبائل فونز، ٹیبلٹس، ڈیجیٹل کیمرے، ہیڈ فون، ویڈیو گیم کنسولز، پورٹیبل اسپیکرز، ای ریڈرز، کی بورڈز، ماؤس، پورٹیبل نیویگیشن سسٹمز اور ایئربڈز پر لاگو ہوں گے۔ تاہم، 28 اپریل 2026 سے لیپ ٹاپ پر بھی یہ قانون لاگو ہوگا۔

یکساں چارجر کے استعمال کے فوائد درج ذیل ہیں:

صارفین کی سہولت
لوگ اپنے مختلف الیکٹرانک آلات جیسے موبائل فونز اور دیگر ڈیوائسز کو صرف ایک ہی USB-C چارجر سے چارج کر سکیں گے، جس سے انہیں مختلف چارجرز خریدنے کی ضرورت نہیں ہوگی۔

الیکٹرانک ویسٹ میں کمی
غیر استعمال شدہ چارجرز سالانہ تقریباً 11000 ٹن الیکٹرانک فضلہ پیدا کرتے ہیں۔ نئے قوانین اس فضلہ کو کم کرنے کی کوشش کریں گے اور چارجرز کے دوبارہ استعمال کی حوصلہ افزائی کریں گے، جو ماحول پر مثبت اثر ڈالے گا۔

رقم کی بچت
صارفین نئے الیکٹرانک آلات خریدتے وقت چارجر کے بغیر بھی خریداری کر سکیں گے، جس سے سالانہ تقریباً 250 ملین یورو کی بچت ہوگی۔

چارجنگ اسپیڈ
یہ نئے اصول اس بات کو یقینی بنائیں گے کہ کسی بھی ڈیوائس کے لیے چارجر استعمال کرتے وقت چارجنگ کی رفتار ایک جیسی ہوگی، جس سے صارفین کو بہتر تجربہ حاصل ہوگا۔

یہ اقدامات یورپی یونین کی جانب سے ایک مؤثر ماحولیاتی اور معاشی حکمت عملی کے طور پر دیکھے جا رہے ہیں۔