بھارتی ڈرامہ ’’ساتھ نبھانا ساتھیا‘‘ میں گوپی بہو کا مشہور کردار ادا کرنے والی اداکارہ دیولینا بھٹاچارجی نے حال ہی میں اپنے مداحوں کو ایک خوشخبری دی ہے۔ اداکارہ نے انسٹاگرام پر ایک ویڈیو شیئر کی جس میں ان کے ننھے بیٹے کی آمد کا اعلان کیا گیا ہے۔ ویڈیو میں ایک سجے ہوئے بے بی کارٹ میں فیروزی کپڑوں میں ملبوس بچہ دکھایا گیا ہے، جس کے گرد کھلونے بکھرے ہوئے ہیں۔
دیولینا نے ویڈیو کے کپشن میں لکھا، ’’ہم اپنی خوشی کے محور کی دنیا میں آمد کا اعلان کرتے ہوئے بے انتہا خوش ہیں، ہمارا بیٹا‘‘، اور بیٹے کی تاریخِ پیدائش 18 دسمبر 2024 بتائی۔
یاد رہے کہ دیولینا نے 14 دسمبر 2022 کو اپنے فٹنس ٹرینر شاہنواز شیخ سے سول میرج کی تھی، اور اس سال اگست میں یہ خوشخبری مداحوں تک پہنچائی تھی کہ وہ ماں بننے والی ہیں۔ دیولینا کے مداحوں اور شوبز کے ساتھیوں نے اس خوشی کے موقع پر انہیں مبارکباد دی ہے۔
