معروف اداکار گووندا اور ان کے بھانجے کرشنا ابھیشیک کے درمیان سات سالہ ناراضگی کا اختتام ہو گیا ہے۔ دونوں کے درمیان تنازعہ کئی سالوں تک میڈیا کی توجہ کا مرکز رہا، لیکن حال ہی میں نیٹ فلکس کے شو ‘دی گریٹ انڈین کپل شو’ پر دونوں نے جذباتی طور پر گلے لگا کر اپنی تمام ناراضگیاں دور کر دیں۔
شو کے دوران گووندا نے کھل کر بتایا کہ 2016 میں ہونے والے ایک واقعے نے ان کے تعلقات میں دراڑ ڈالی تھی۔ انہوں نے کہا، “اس وقت میں غصے میں تھا اور کرشنا کے کچھ جملوں پر اعتراض کیا تھا۔ میری بیوی سنیتا نے مجھے سمجھایا کہ انڈسٹری میں ایسے واقعات ہوتے رہتے ہیں، اور کرشنا کو اپنے کام کرنے دینا چاہیے۔”
کرشنا نے اپنی غلطی تسلیم کرتے ہوئے معافی مانگتے ہوئے کہا، “میں آپ سے بہت محبت کرتا ہوں، اور اگر آپ کے دل میں کوئی غلط فہمی تھی تو میں اس کے لیے معافی چاہتا ہوں۔”
کرشنا نے مزید جذباتی انداز میں کہا، “آج میرے لیے خاص دن ہے۔ میرے سات سالہ ‘ونواس’ (ناراضگی) کا خاتمہ ہو گیا ہے۔ یہ لمحہ میری زندگی کے سب سے بہترین لمحات میں سے ایک ہے۔”
یہ تنازعہ اس وقت شروع ہوا تھا جب گووندا کو کرشنا کے ایک مذاق پر بے عزتی محسوس ہوئی۔ بعد ازاں، کرشنا کی اہلیہ کشمیرا شاہ کے ایک ٹویٹ نے صورتحال کو مزید بگاڑ دیا، جس میں “پیسے کے لیے ڈانس کرنے والوں” کا ذکر کیا گیا تھا۔ اس تنازعے کے باعث سنیتا آہوجا نے شو پر آنے سے انکار کر دیا تھا اور کہا تھا کہ دونوں خاندانوں میں صلح ناممکن ہے۔
تلخ ماضی کے باوجود، یہ ملاقات ایک یادگار لمحہ بن گئی۔ گووندا شو میں شکتی کپور اور چنکی پانڈے کے ساتھ نظر آئے، لیکن شو کی سب سے خاص بات ان کی کرشنا کے ساتھ جذباتی صلح تھی، جس نے شائقین کے دل جیت لیے۔
