اسلام آباد: پاکستان تحریک انصاف (پی ٹی آئی) کے رہنما ذلفی بخاری نے ڈونلڈ ٹرمپ کے سامنے عمران خان سے مبینہ ناانصافیوں کا معاملہ اٹھانے کا اعلان کردیا۔
بانی پی ٹی آئی کے قریبی دوست ذلفی بخاری نے ڈونلڈ ٹرمپ کی ٹیم اور اہل خانہ سے رابطے میں ہونے کی تصدیق کرتے ہوئے کہا کہ امریکی صدر کا حلف اٹھانے کے بعد ٹرمپ کی ٹیم، بیٹی ایوانکا اور داماد جیرڈ کشنر سے عمران خان اور پی ٹی آئی سے ہونے والی مبینہ ناانصافیوں پر بات کروں گا۔
ذلفی بخاری نے وضاحت کی کہ وہ ملاقاتوں میں عمران خان کے کیس سمیت انسانی حقوق و جمہوری اقدار کی خلاف ورزیوں اور قانون کی حکمرانی کی خراب صورتحال پر بات کریں گے۔
ذلفی بخاری کا کہنا تھا کہ ٹرمپ کے دل میں عمران خان کے لیے نرم گوشہ ہے اور وہ ایک بار انہیں سنائی گئی سزا پر اظہار تشویش بھی کرچکے ہیں۔علاوہ ازیں ذلفی بخاری نے عمران خان کی طرف سے ڈونلڈ ٹرمپ کو امریکی صدارتی الیکشن میں تاریخی فتح حاصل کرنے پر مبارک باد دی۔
انہوں نے لکھا کہ ’میں عمران خان اور تحریک انصاف کی جانب سے ٹرمپ اور جے ڈی وانس کو تاریخی فتح اور کم بیک پر مبارک باد پیش کرتا ہوں‘۔ ٹرمپ کو یہ عظیم فتح بڑی مشکلات اور رکاوٹوں کے بعد حاصل ہوئی تاہم یہ فتح حقیقی تبدیلی اور معاشی استحکام کیلیے واضح پیغام ہے۔ذلفی بخاری نے ٹرمپ کی جیت کو جمہوریت کی فتح قرار دیتے ہوئے کہا کہ اس سے باقی سب (ممالک) کو بھی امید ملتی ہے۔
