الیکشن کمیشن نے حافظ نعیم کو الیکشن ایکٹ کے ضابطہ اخلاق کی خلاف ورزی پر شوکازنوٹس جاری کردیا

الیکشن کمیشن نے جماعت اسلامی پاکستان کے امیر حافظ نعیم الرحمن اور یونین کمیٹی 8 کے چیئرمین کو الیکشن ایکٹ کے ضابطہ اخلاق کی خلاف ورزی پر شوکاز نوٹس جاری کیا ہے۔ یہ نوٹس اظہار وجوہ کے طور پر چیئرمین ٹاؤن میونسپل کارپوریشن اور گلبرگ ٹاؤن کے یو سی چیئرمین کو بھی دیا گیا ہے۔

ڈسٹرکٹ مانیٹرنگ افسر اور ایڈیشنل کمشنر ضلع وسطی، محمد عاصم عباسی کی جانب سے جاری کیے گئے نوٹس میں کہا گیا ہے کہ حافظ نعیم الرحمن نے 3 نومبر کو یو سی 5 کے سنگھم گراؤنڈ، بلاک 9، فیڈرل بی ایریا میں جماعت اسلامی سے وابستہ این جی او “الخدمت” کے آئی ٹی سے متعلق پروگرام “بنو قابل” میں بطور مہمان خصوصی شرکت کی۔ نوٹس میں وضاحت دی گئی کہ ضمنی بلدیاتی انتخابات کے دوران بڑے جلسوں اور تقریبات پر پابندی ہے، جس کی خلاف ورزی کی گئی۔

نوٹس میں مزید کہا گیا کہ حافظ نعیم الرحمن نے ضابطہ اخلاق کے پیرا 16 بی، 27، 29، 30 اور پیرا 32 کی خلاف ورزی کی ہے۔ لہٰذا انہیں 6 نومبر کو دوپہر 3 بجے ذاتی حیثیت میں یا اپنے وکیل کے ذریعے وضاحت پیش کرنے کی ہدایت دی گئی ہے۔

اسی سلسلے میں، ڈسٹرکٹ مانیٹرنگ افسر نے گلبرگ ٹاؤن کے چیئرمین نصرت اللہ اور اسی ٹاؤن کے یو سی چیئرمین فاروق نعمت اللہ کو بھی بنو قابل پروگرام میں شرکت کرنے پر نوٹس جاری کیے ہیں۔ فاروق نعمت اللہ کو 6 نومبر کو سہ پہر 3:30 بجے اور نصرت اللہ کو 4 بجے پیش ہونے کی ہدایت دی گئی ہے۔

یہ نوٹس کراچی میں 14 نومبر کو ہونے والے بلدیاتی ضمنی انتخابات سے متعلق ہیں، جس میں 10 نشستوں پر پولنگ کی جائے گی۔