نواز شریف، شہباز شریف، فضل الرحمٰن اور بلاول بھٹو کی اہم ملاقات آج

لاہور: آئینی ترامیم کے حوالے سے مسلم لیگ ن کے صدر نواز شریف، وزیراعظم شہباز شریف، مولانا فضل الرحمٰن اور بلاول بھٹو زرداری کی اہم بیٹھک آج ہوگی۔

ذرائع کے مطابق، نواز شریف نے مولانا فضل الرحمٰن اور بلاول بھٹو زرداری کے لیے جاتی امرا میں ایک دعوت کا اہتمام کیا ہے، جس میں وزیراعظم شہباز شریف بھی شریک ہوں گے۔ اس ملاقات کا مقصد حکومتی اتحاد میں مجوزہ آئینی ترامیم پر اتفاق رائے پیدا کرنا ہے۔

اجلاس کے دوران، مولانا فضل الرحمٰن اور آزاد اراکین کو ساتھ ملا کر 26ویں آئینی ترامیم کی منظوری کے لیے کوششیں کی جائیں گی۔ ذرائع کا کہنا ہے کہ کل مجوزہ آئینی ترامیم کی منظوری کی کوشش کی جائے گی۔

علاوہ ازیں، صدر مملکت آصف علی زرداری نے قومی اسمبلی اور سینیٹ کے علیحدہ علیحدہ اجلاس کل طلب کرلیے ہیں، جن میں 26ویں آئینی ترمیم کا مسودہ پیش کیے جانے کا امکان ہے۔ اسی طرح، وفاقی کابینہ کا اجلاس بھی کل طلب کیا گیا ہے۔ یہ تمام اقدامات آئینی اصلاحات کے عمل کو آگے بڑھانے کے لیے اہم سمجھے جا رہے ہیں۔