راولپنڈی: پی ٹی آئی کے بانی عمران خان نے 28 ستمبر کو راولپنڈی میں منعقد ہونے والا جلسہ منسوخ کرنے کا فیصلہ کیا ہے۔
اڈیالہ جیل میں صحافیوں سے غیر رسمی گفتگو کرتے ہوئے، عمران خان نے بتایا کہ علی امین گنڈا پور سمیت تمام رہنماؤں کو ہدایت کی گئی ہے کہ اسٹیبلشمنٹ کے ساتھ کسی قسم کے مذاکرات کا کوئی فائدہ نہیں ہے۔
ایک سوال کے جواب میں انہوں نے کہا کہ رؤف حسن کو غلط فہمی ہوئی ہے۔ میں سب کو بتاتا ہوں کہ ان سے مذاکرات کا کوئی فائدہ نہیں، 8 ستمبر کے جلسے کے بعد میں واضح کر چکا ہوں کہ ہم کسی بھی شخص سے مذاکرات نہیں کریں گے، اسٹیبلشمنٹ کے لوگ دائیں دکھا کر بائیں چلے جاتے ہیں۔
پی ٹی آئی نے راولپنڈی میں جلسے کے لیے ڈپٹی کمشنر کو درخواست دی تھی، لیکن عمران خان نے کہا کہ 28 تاریخ کو راولپنڈی میں جلسہ نہیں بلکہ احتجاج کریں گے۔ ہم لاہور ہائی کورٹ راولپنڈی بنچ سے درخواست واپس لے رہے ہیں کیونکہ ہمیں معلوم ہے کہ وہ جلسے کی اجازت نہیں دیں گے۔ اگر اجازت دیں گے تو شہر سے باہر۔ لہذا، ہم اب راولپنڈی میں ہفتے کے روز ایک بڑا احتجاج کریں گے، اور ہمارے وکلاء کل سپریم کورٹ کے باہر بھی احتجاج کریں گے۔
عمران خان نے یہ بھی کہا کہ انہوں نے کبھی جسٹس منصور علی شاہ سے ملاقات نہیں کی، اور آئین کے مطابق سینئر ترین جسٹس کو چیف جسٹس مقرر کیا جانا چاہیے۔ ایک ماہ رہ گیا ہے چیف جسٹس کے نام کا اعلان کرنے کے لیے۔
