انقرہ: ترکیہ مصر کے دارالحکومت قاہرہ میں عرب لیگ کے وزرائے خارجہ کے اجلاس میں شرکت کرے گا۔ عرب لیگ کے وزارتی اجلاس میں ترکیہ کی شرکت 13 سال بعد ہو رہی ہے۔ ترک قیادت نے غزہ میں حماس کے خلاف اسرائیلی فوج کی کارروائیوں کی سخت مذمت کی ہے اور عالمی عدالتِ انصاف میں اسرائیل کے خلاف قتلِ عام کے الزام میں مقدمات کے حوالے سے فعال کردار ادا کیا ہے۔ حالیہ برسوں میں عرب لیگ کے رکن ممالک کے ساتھ ترکیہ کے تعلقات خاصے کشیدہ رہے ہیں، خصوصاً مصر، متحدہ عرب امارات اور سعودی عرب کے ساتھ۔ شام کی قیادت نے بھی ترکیہ سے شکایات کا اظہار کیا ہے۔ غزہ پر اسرائیل کے حملوں کے آغاز کے بعد، ترکیہ نے عرب لیگ اور اسلامی کانفرنس کی تنظیم کے کانٹیکٹ گروپ کے ساتھ وابستگی اختیار کی ہے تاکہ اس بحران کا فوری حل تلاش کیا جا سکے۔
