شان مسعود نے بابر اعظم دنیا کے بہترین بلے باز قرار دیدیا

قومی ٹیسٹ ٹیم کے کپتان شان مسعود نے بابراعظم کو دنیا کے بہترین بلے بازوں میں سے ایک قرار دیا ہے۔ کرک انفو کے ساتھ دیے گئے ایک انٹرویو میں شان مسعود نے کہا کہ “دنیا کا کوئی بھی کھلاڑی یہ نہیں کہہ سکتا کہ بابراعظم کا مستقبل خطرے میں ہے۔ ان کے پاس طویل فارمیٹ میں ‘عظیم ترین بلے بازوں میں سے ایک’ بننے کی تمام خوبیاں موجود ہیں۔”

شان مسعود نے مزید کہا کہ انگلینڈ کے خلاف مختصر وقفے کے بعد ہم بابراعظم کو ایک مضبوط کھلاڑی کے طور پر واپس دیکھیں گے۔ انہوں نے وضاحت کی کہ کسی بھی کرکٹر پر ایسا وقت آ سکتا ہے اور اس سے نکلنے کے لیے ایک وقفہ ضروری ہے۔ انہوں نے یقین دلایا کہ بابر ہمیشہ پاکستان کے اہم کھلاڑیوں میں سے ایک رہیں گے۔

اس سے قبل، بابراعظم نے گزشتہ ماہ کے آغاز میں وائٹ بال ٹیم کی کپتانی سے مستعفی ہونے کا اعلان کیا تھا۔ پہلے ٹیسٹ میں انگلینڈ کے ہاتھوں شکست کے بعد بابراعظم، شاہین اور نسیم کو ٹیم سے ڈراپ کر دیا گیا تھا اور انہیں ریسٹ دیا گیا تھا۔

حال ہی میں، بابراعظم کے مستعفی ہونے کے بعد دورہ آسٹریلیا اور زمبابوے کے لیے محمد رضوان کو کپتان جبکہ آغا سلمان کو ان کا نائب مقرر کیا گیا تھا۔

یہ بھی یاد رہے کہ بابراعظم نے آخری 9 ٹیسٹ میچز کی 17 اننگز میں صرف 352 رنز بنائے ہیں، جس کی اوسط 20.71 ہے اور ان کا بہترین اسکور 41 ہے۔ انہوں نے 55 ٹیسٹ میچز میں 43.92 کی اوسط سے 3,997 رنز بنائے ہیں، جن میں 9 سنچریاں اور 26 نصف سنچریاں شامل ہیں۔