عشق مرشد کا گانا لکھا، مگر کریڈٹ نہیں دیا گیا!

پاکستانی شوبز انڈسٹری کی معروف اداکارہ جویریہ سعود نے انکشاف کیا ہے کہ انہوں نے مقبول ڈرامہ سیریل ‘عشق مرشد’ کا گانا لکھا تھا، لیکن انہیں اس کا کریڈٹ نہیں دیا گیا۔

نجی ٹی وی چینل کے مارننگ شو میں گفتگو کرتے ہوئے، جویریہ سعود نے کہا کہ انہوں نے کئی پاکستانی ڈراموں کے ٹائٹل ٹریک لکھے ہیں، مگر انہیں کبھی بھی ان کا کریڈٹ نہیں دیا گیا۔ انہوں نے اس بات کا ذکر کرتے ہوئے کہا کہ انہیں اپنے دوستوں سے دھوکہ ملا، لیکن وہ اس تجربے سے سیکھ چکی ہیں اور انہیں اس بات کا کوئی پچھتاوا نہیں ہے۔

انہوں نے بتایا کہ انہوں نے مقبول ڈرامہ سیریز ‘خدا اور محبت’ کا پہلا سیزن بھی پروڈیوس کیا تھا اور اس کا گانا بھی انہوں نے لکھا تھا۔ اس گانے کی مقبولیت کی وجہ سے دوسرے سیزن میں بھی ان کا لکھا گیا گانا شامل کیا گیا، لیکن بعد میں او ایس ٹی میں کچھ تبدیلی کرکے گانے کا کریڈٹ کسی دوسرے فنکار کو دے دیا گیا۔ جب انہوں نے اس بارے میں شکوہ کیا تو انہیں جواب دیا گیا کہ اگر گانا مقبول نہیں ہوتا تو وہ شکوہ نہیں کرتیں۔

جویریہ سعود نے مزید کہا کہ انہوں نے حالیہ بلاک بسٹر ڈرامہ سیریل ‘عشق مرشد’ کا گانا بھی لکھا، لیکن پھر بھی انہیں اس کا کریڈٹ نہیں دیا گیا۔ انہوں نے یہ بھی بتایا کہ انہوں نے دیگر ڈراموں کے ٹائٹل ٹریک بھی لکھے ہیں، مگر ہمیشہ کریڈٹ سے محروم رہی ہیں۔